Inaugurada la UABRA cola ausencia por enfermedá de Vallaure

La Universidá Asturiana de Branu (UABRA) principió esti llunes la so actividá con un actu nel Palaciu d'Oumaña na que tenía prevista la so presencia Emilio Marcos Vallaure. Un problema de salú menor impidió la participación del conseyeru.
 
Nesti actu, qu'entamó a les 13 hores na Casa Cultura Palaciu d’Oumaña, participaron Ana María Cano, presidenta de l’Academia de la Llingua Asturiana (ALLA); Vicente Domínguez García, vicerrector d’Estensión Universitaria, Cultura y Deportes; José Luis Fontaniella, alcalde de Cangas; y Xosé Antón González Riaño, direutor de los cursos. El Gobiernu nun unvió a nengún representante a Cangas en sustitución de Vallaure, que tuvo qu'ausentase por enfermedá.
 
Nes sos intervenciones, toos destacaron la importancia de la UABRA y l'alta participación. "Na UABRA somos munchos y eso requier un gran esfuerciu", destacó Riaño. Mentes, Cano señaló que la Universidá Asturiana de Branu "enllaza perfeutamente colo que ye l'espíritu de la Estensión Universitaria", y Domínguez que los cursos qu'ufierta esta actividá "son Estensión Universitaria d'altísima calidá".
 
La UABRA, actividá entamada pola ALLA cola collaboración de la Universidá d’Uviéu y el Conceyu de Cangas del Narcea, va reunir a unes 150 persones –ensin contar conferenciantes, visitantes y músicos que van tomar parte en delles actividaes paraleles– per dos selmanes pa participar nos cursos programaos pa estos díes na Escuela-Hogar de Cangas. Asina, dende güei van impartise l’elemental y avanzáu de llingua asturiana, y el de gallego-asturiano. Amás, dientro del ciclu de cursos d’afondamientu cultural y llingüísticu, van dase esta selmana los de ‘Capacitación pa la traducción al asturianu’, ‘Coses nueves n’Internet. Aplicaciones personales y educatives’, y ‘Xuegos y tradiciones populares asturianes’.
 
Nesta xornada también tuvo llugar la inauguración d’una esposición d’humor gráficu protagonizada por tires de Neto, Ernesto García del Castillo, que lleva’l nome de ‘Na punta (la llingua)’. Ésta va tar abierta’l públicu hasta’l día 12 na Casa Cultura Palaciu d’Oumaña.