Illas y Castrillón van disponer d’un serviciu de normalización mancomunáu dende xunu

Política Llingüística y los ayuntamientos d’Illas y Castrillón alcordaron entamar un serviciu de normalización llingüística mancomunáu. Ésti va principiar a furrular nel mes de xunu y va tener la so sede nel conceyu costeru.
 
Según informa la Conseyería de Cultura y Deporte, col de Castrillón y Illas van funcionar n'Asturies 14 servicios de normalización, configurando una Rede de Normalización que llega a 29 conceyos y a más de 685.000 asturianos, más de la metá de la población del país. Estos servicios constitúin una ferramienta fundamental p'averar el procesu de recuperación y promoción del asturianu a la realidá sociollingüística de los conceyos asturianos. Por ello, y porque amás son unidaes xeneradores de puestos de trabayu, les partíes destinaes a apoyar estos servicios son les úniques que nun se vieron afeutaes pol axuste presupuestariu de la Direición Xeneral de Política Llingüística (un total de 327.900 euros). Nel casu del últimu n’incorporase, va recibir una subención de 9.000 euros pa esti añu.
 
Los Servicios de Normalización Llingüística intégrense nel trabayu de los conceyos col llabor de planiar y executar delles actuaciones de promoción y normalización del idioma nel ámbitu del so conceyu: campañes informatives, edición de espublizaciones, actividaes pa favorecer l'usu del asturianu ente neños y mozos, y de recuperación de la toponimia tradicional.