“Ígor tenía munchísimu material, muncho d’ello inédito”, rescampla Norman Fernández

|
Norman Fernández esposición Ígor Medio

La esposición ‘Xente llano de Xixón. La obra gráfica d’Ígor Medio’ inauguróse’l martes nel xixonés Muséu Barjola como parte de les actividaes de la XLIII Selmana de les Lletres Asturianes. El so comisariu, Norman Fernández, apuntó que “Ígor tenía munchísimu material, muncho d’ello inédito, y ye importante qu’esti material se vea”.

Un númberu importante de persones axuntóse ayeri nuna calorosa tarde nel tercer pisu de la instalación xixonesa, onde se pueden ver dellos paneles con creaciones d’Ígor Medio, persona a la que ta dedicada esta edición de la gran fiesta de la nuesa lliteratura, y otros efeutos personales del dibuxante y músicu, como un bouzouki. Too ello acompañao de figures de cartón de tamañu humanu de los personaxe de ‘La familia Castañón’ qu’encantaron a les neñes y neños presentes.

La conseyera de Cultura, Política Llingüística y Turismu, Berta Piñán, tuvo presente nel actu xunto con Antón García, direutor xeneral de Política Llingüística. La escritora apuntó qu’esta Selmana de les Lletres “quier rendir homenaxe a un autor que falaba l’idioma de la música y del cómic con un talentu creativu al algame de bien pocos. Prauticaba l’idioma de la empatía. Ígor yera capaz a xenerar grupu, a axuntar a munches persones alredor d’una conferencia, una música o un mensaxe”, principió.

“Ígor marchó enantes de tiempu, pero dexónos una obra prolífica enllena de xenialidaes”, lo que fala “del so calter inquietu”. “Ensin dulda nenguna, lo sos padres Sonia y Luis foron responsables, cómplices necesarios, p’alimentar la so capacidá innata pa espresase al traviés de la música y el dibuxu, pa esplorar y garrar caminos nuevos pa contar lo que-y venía a su cabeza”, siguió Piñán, qu’añadió que “el resultáu podemos velu equí esta tarde” nuna “muestra con munchos orixinales”.

Apuntó tamién que “fixo too eso dexando nel camín un ruxideru escomanáu d’amigos. Munchos d’ellos van xubir mañana –por güei– nel teatru de la Llaboral pa recordalu y facer el so propiu homenaxe en forma de cantar”. La conseyera recordó amás que la edición próxima de la Selmana de les Lletres Asturianes, qu’enseña “el talentu tan estraordinariu qu’atesoren los nuesos autores en llingua asturiana”, va dedicase a Xosé Bolado, y animó a disfrutar de les actividaes d’esta edición “y averase a les llibreríes” pa facese colos dos títulos conmemorativos, ‘Ígor Medio. El carbón y l’arena’ y ‘Contos eonaviegos”.

Calidá humana fuera de lo normal.

Tamién tomaron la pallabra los dos coordinadores d’esta Selmana de les Lletres, Fernández y Ruma Barbero, que puntualizó que “l’equipu foi más ampliu” al contar con Sonia Tuya, madre d’Ígor, y el dibuxante Javier Rodríguez. “Una de les principales dificultaes d’entamar esta esposición foi seleicional el material. Ígor tenía munchísimu material, muncho d’ello inédito, y ye importante qu’esti material se vea”, espresó Norman, que s’escusó por nun dominar la llingua asturiana magar afirmar sentise namái asturianu.

“Pa nós ye una satisfaición. Yo la verdá ye que nun conocía a Ígor en persona, problablemente falé con Ígor menos veces que deos tengo na mano, pero sí descubrí que yera una persona esceicional y descubrílo al traviés del entusiasmu de les persones a les que-yos pidíamos dalgo. Salía-yos de dientro y eso tien que ser por dalguien que tenía una calidá humana fuera de lo normal”, esplicó.

Tanto él como Barbero fixeron una visita guiada a l’amuesa a tolos presentes, dando munchos detalles sobre los paneles espuestos que se van poder visitar hasta'l 3 de xunu. “Les viñetes de ‘La familia Castañón’ rotulóles toes a mano, más de 500, porque pa él la rotulación forma parte del dibuxu”, esplicó nun primer momentu.

Darréu repasaron otros detalles de la esitosa tira braniega –inclúise una páxina de la futura próxima entrega que nun llegó a espublizase–, asina como de ‘Little Nemo’, de los inéditos ‘Rosaurio’ (2001) o ‘Totalnet’ (2004), de ‘Los camientos de Deva y Xulián’, de ‘Los pequeñacos’, de ‘Anselmo Ensombras: una historia del cine español’ y d’un storyboard del curtiu ‘Rondadores nocturnos’ d’Aure Roces’, o de trabayos conxuntos con Javi Rodríguez como l’inéditu ‘Currículu’ (1998) o ‘Love gun’. Ente los materiales espuestos tamién rescamplen una caricatura de los integrantes de Felpeyu pa un llibru de testu o una tira de ‘Los aguarones’, los míticos personaxes de Ruma y Son qu’asoleyaba’l periódicu quincenal ‘Güei’, espublizada en xunu del 2000 nel que Medio representaba a los dos autores.

Final musical

La inauguración terminó con una actuación musical d’un grupu de músicos compuestu pol propiu Ruma Barbero, Alberto Ablanedo, Rubén Bada, Pepín de Muñalén y Dolfu R. Fernández. Los cinco ofrecieron una sesión folk improvisada.

Na semeya, Fernández esplica un panel de la esposición acompañáu de Barbero, con Piñán atenta a la esplicación.

Contador Estadistiques