Ignaciu Llope espubliza la segunda parte de ‘De les coses del mundu’

El segundu volume de ‘De les coses del mundu’, llibru que recopila artículos d’Ignaciu Llope sobre cuestiones polítiques y antropolóxiques, yá ta nes llibreríes. Nesta segunda parte, l’autor céntrase na lliteratura y na política.
 
En concreto, los artículos que recueye Llope traten sobre la Universidá d’Uviéu, la lliteratura asturiana y la problemática del occidente del país, según apunten dende Suburbia Ediciones, que define la obra como un “llibru indispensable pa entender y respetar la cultura asturiana y la so llingua”. D’esta forma, el de Cuideiru completa la segunda parte d’esta iniciativa de recopilación d’artículos espublizaos en dellos medios que tuvo’l so entamu nel 1989 y que la editorial xixonesa recuperó l’añu pasáu con una edición na que se recoyía lo espublizao a finales de los 80 y lo que foi asoleyando Llope hasta’l 2011. Nesti primer volume de ‘De les coses del mundu’, l’autor introduxo aquellos que taben rellacionaos col celtismu, el folk y el paisaxe y la historia de Cuideiru. Hai que destacar qu’esti trabayu foi’l décimu llibru más vendíu del catálogu de Suburbia nel 2011.
 
Otra manera, el Club de Prensa Asturiana de Xixón (salón de Centru San Eutiquio) va acoyer el llunes la presentación del poemariu ‘Al pie de la brisa’, de Xavier Frías Conde, espublizáu tamién pola editorial xixonesa. Ésta va principiar a les 20 hores y nella van participar l’autor y Aurora García Rivas.