Ignaciu Llope esixe debatir con Ovidio Sánchez y Álvarez Areces

El candidatu de la coalición d'izquierda nacionalista y verde "Unidá" Ignaciu Llope fizo ayeri pública la so voluntá de participar nun hipotéticu debate públicu ente candidatos a la presidencia d'Asturies, una posibilidá reclama que garra fuerza dempués de que'l socialista Álvarez Areces aceptare'l convite que-y ficiere nesti sentíu l'aspirante pol PP a la presidencia asturiana, Ovidio Sánchez. Llope esixó participar tamién elli nel debate p'asina "poder demostrá-yos a Areces y Ovidio lo escosao de los sos proyectos políticos y la so falta de rempuestes a los problemes reales d'Asturies" y esplicó que tolos candidatos a la presidencia deberíen tener el mesmu espaciu nos medios públicos" y poder participar nun "debate abiertu" col oxetivu de que "los asturianos y asturianes conozan toles opciones ente les que pueden escoyer el 27 de mayu".

Ignaciu Llope, candidatu a la presidencia d'Asturies pola coalición Unidá, qu'agrupa a les formaciones polítiques Andecha Astur, Izquierda Asturiana y Los Verdes-Grupu Verde, llamentó que la llexislación vixente consienta lo que-y abulta "una campaña electoral desigual" na que la mayor inversión económica traduzse nun mayor númberu de votos. El candidatu d'Unidá llamó l'atención sobre lo conveniente de regular per llei estos aspectos, garrando como casu prácticu "otres campañes más igualitaries, como ye'l casu de Francia, onde estos díes se celebra la carrera pol Elíseu". Llope sorrayó como'l sistema francés "obliga a que los doce candidatos a la presidencia gocen del mesmu espaciu nos medios públicos y que los sos programes electorales se faigan llegar per corréu a tolos electores", una situación que rescampla cola asturiana, "onde la llexislación permite qu'Areces y Ovidio asonsañen los debates a l'americana ente demócrates y republicanos".

Llope acusó al candidatu d'IX-Bloque por Asturies - Verdes Jesús Iglesias de querer amestase al debate ente los dos grandes oponentes no que-y abulta "un intentu inmoral por querer facese defensor esclusivu de les voces discordantes col turnu dual de partíos" y negó que la presencia d'Iglesias aportare daqué novedá al debate en cuantes que'l representante d'IX.BA-Verdes namás diba comportase nel debate "como un encontu p'Areces" lleváu pol so oxetivu de "malgobernar Asturies otros cuatro años xunto colos socialistes".

El candidatu d'Unidá defendió que tolos candidatos deberíen tener el mesmu tratu y espaciu nos medios, un tratu igualitariu que'l candidatu d'Unidá esixó que en primer llugar a "los medios públicos como la RTPA que pagamos tolos ciudadanos y ciudadanes".