Ignaciu Llope diz que la TV ye un xuguete en manes d’Areces

Siguen les crítiques contra'l procesu de selección de personal pa la TV autonómica. Ayeri, per una parte, foi'l partíu Izquierda Asturiana quien tamién llamentó y condenó l'ausencia del asturianu ente los criterios pa escoyer al personal de la futura canal autonómica, mientres que per otra parte, Javier Valledor suscribió y fizo propies les crítiques d'Izquierda Xunida - Bloque por Asturies contra'l procesu de puesta en marcha del Ente, cargando especificamente contra la persona del so diector, José Ramón Pérez Ornia, del que dixo que tien "retirada la so confianza"

Pela so parte, el portavoz d'IAS, Ignaciu Llope solicitó nun comunicáu de prensa "la paralización de la creación del ente y la modificación de la llei p'adaptarla a criterios de xestión tresparentes y democráticos" Llope calificó la situación del Ente de "despropósitu que yá taba cantáu dende qu'entamó'l procesu de creación d'una televisión que nun se va mandar de forma democrática y qu'en cuenta de servir a los intereses xenerales de la ciudadanía d'Asturies va tar al serviciu del poder políticu actual y la so concepción aldeana teñida de cosmopolitismu de caleya de la realidá del país".

Llope defendió la obligatoriedá del conocimientu del asturianu pa poder acceder a determinaos puestos, y identificó un problema de partida que vien de la mesma composición del Conseyu d'Alministración formáu por xente mayoritariamente ayeno al mundu de la comunicación "lo que permite que la televisión y el director de la mesma, sían una xuguete teledirixíu nes manes del señor Jorge Fernández León y del mesmu Vicente Álvarez Areces que proyecten les sos filies y fobies personales nel Ente".