Iglesias écha-yos a los socialistes la culpa de que franciere la negociación

Vicente Álvarez Areces va salir güei escoyíu como Presidente d'Asturies pal so tercer mandatu. Ello va ser por mayoría cenciella, dempués de que'l pasáu vienres nun llograre la mayoría absoluta al faltá-y los votos d'IX-BA-LV, formación cola que gobernare los últimos 4 años pero cola qu'esta vegada les negociaciones pa repitir gobienu fracasaren, con daqué de sorpresa, dempués de llargos díes de diálogu nos qu'incluso se llegare a zarrar lo más del que diba ser el programa de gobiernu.

Perdida yá toa posibilidá de volver al diálogu y cola perspectiva d'un PSOE gobernando en minoría, el secretariu d'IX Jesús Iglesias declaró esti fin de selmana que foi "decisión del PSOE el que teamos na oposición" una oposición qu'alvirtió nel debate de la Xunta Xeneral que la formación va a exercer con toles consecuencies. Iglesias echó-y la culpa de que nun se firmare pautu de gobiernu a que los socialistes presentaren un "ultimátum" que la executiva d'IX vio que nun podía aceptase, según esplicó'l diputáu nuna entrevista al diariu La Nueva España.