Identificaos dos casos d'asturianes desapaecíes na dictadura arxentina

La estudiante de medicina Silvia Beatriz Martínez López y la estudiante d'Arquitectura, Stella Maris Álvarez Blanco desapaecieron nos díes de la dictadura militar arxentina, ente 1976 y 1983, cuando teníen 20 y 21 años d'edá. Estos dos casos que se conocieron ayeri lleven a quince'l númberu total d'asturianos y descendientes d'asturianos desapaecíos poles autoridaes de la xunta militar arxentna y que yá tán identificaos dientro del proyectu "recuperando memoria" que lleva alantre l'Axencia Asturiana de Cooperación al Desarrollu, que quier con esta iniciativa que se faiga la reparación moral y económica pa los familiares d'estes víctimes.


Rafael Palacios, responsable de l'Axencia de Cooperación, esplicó como'l Gobiernu asturianu collabora agora con dos proyectos, un d'ellos de busca de víctimes al través d'análisis xenéticu nel que s'invirtieron 50.000 euros y otru denomináu "Memoria, verdá y xusticia" nel que s'invirtió otra cantidá asemeyada. Palacios sorrayó como estos proyectos ayuden a la recuperación de la identidá de muncha xente y muestren al mundu "la realidá de les acciones que se fexeron n'Arxentina".

El director de l'Axencia Asturiana de Cooperación esplicó qu'hai 10 casos de persones que nun se sabe seguro si son asturianos o non y pidió datos a quien pudiere tenelos pa que los punxere en conocencia del so departamentu sobre les persones de Marcelino álvarez Fernández, Lucina Álvarez Rodríguez, Patricia Cristina y Pedro Bernardo Oviedo Domínguez, Aníbal Rodríguez lvarez, Juan Carlos Ramos López ´Lito´, Juan Carlos Álvarez González, ángel Arias Álvarez, Antonio Fernández Arias García y Vicente Fernández Quintana.