IAS y PSOE presenten el so alcuerdu en Piloña como un compromisu de tresparencia na xestión

Izquierda Asturiana-Asturianistes por Piloña y l'agrupación del Partíu Socialista de Piloña ficieron públicu ayeri'l pautu de gobiernu pol que'l partíu socialista y la formación asturianista van compartir gobiernu nesti conceyu del oriente d'Asturies . El socialista Camilo Montes va ser l'alcalde del conceyu, mientres que'l conceyal d'IAS José Ángel García, "Allende" va ocupar el puestu de teniente d'alcalde.

Según esplicaron los dos políticos, l'alcuerdu ente ellos naz como un compromisu por acabar colos 8 años de mayoría absoluta del alcalde popular Juan Roberto Pérez, al qu'acusen de dexar una delda de más de 600 millones de pesetes sobre la qu'anunciaron que va facese una auditoría. Los dos políticos dieron anuncia de qu'enantes de tomar posesión van facer una declaración de bienes personales que van facer pública y que van dexar que se compare con otra que van facer nel 2011 n'acabando'l mandatu. L'alcuerdu incluye la creación de la conceyalía de Participación Ciudadana, una midida cola que se quier recuperar les Xuntes de Vecinos pa "democratizar el conceyu". Igualmente, p'acabar coles arbitariedaes que denunciaron qu'existíen hasta agoranes contrataciones, Montes y Allende esplicaron que va recuperase'l sistema de sortéu.