IAS pide que se devuelvan a Asturies los "Archivos de Salamanca"

L'historiador y miembru de la Dirección Nacional d'Izquierda Asturiana (IAS) Faustino Zapico solicitó otra vegada que se devolvieren a Asturies los papeles de Salamanca y denunció'l treslláu a Cataluña de documentación asturiana.

Nel día en qu'entamó la devolución a Cataluña de los sos archivos históricos incautaos pol Gobiernu franquista tres de la Guerra Civil Española, l'historiador Faustino Zapico salió otra vuelta a la escena pública pa denunciar que la existencia d'una copia microfilmada de los documentos asturianos nun supón que los orixinales nun hayan volver a Asturies. Zapico diz que "Zapatero y Areces ha esplicar por qué "ye bono devolvé-y a Cataluña les 500 caxes de documentos que se-y robaron y non lo les más de 700 que se llevaron illegalmente d'Asturies".

El representante d'Izquierda Asturiana llamó l'atención sobre'l fechu de que parte de la documentación asturiana marchare agora pa Cataluña, colo que la historia asturiana conviértese en "moneda de cambéu" y demuéstrase amás el "nulu interés del gobiernu asturianu en mirar pol nuestru patrimoniu".

Va agora añu y mediu Izquierda Asturiana (IAS) solicitare formalmente al Principáu y a dellos conceyos un posicionamientu sobre la devolución a Asturies d'esta documentación" una devolución especialmente especialmente importante pa la ciudá de Xixón "que tuvo una gran importancia simbólica nel procesu por ser el llugar onde s'incautó la mayor parte de la documentación asturiana y onde tuvo'l Conseyu Soberanu y les autoridaes republicanes que representaben la llexitimidá del pueblu asturianu".

Pal historiador y miembru d'IAS ye "imprescindible que los orixinales vuelvan a Asturies" y ello tamién por razones incluso técniques, y ello ye que según diz Zapico "non tolos materiales tan microfilmaos y hai dellos se mal estáu de conservación". Amás d'ello Zapico afirma que "la documentación que ta en Salamanca nun ye esclusiva de la Guerra Civil y nella hai archivos de tol primer terciu del sieglu XX".