IAS pide más asturianu na Gaceta del Conceyu de Xixón

L'agrupación del partíu nacionalista Izquierda Asturiana en Xixón denunció que la publicación oficial qu'asoleya'l Conceyu pa dar anuncia de les actividaes culturales y iniciatives que s'entamen dende'l gobiernu de la ciudá ta menguando de va un tiempu p'acá l'espaciu qu'acuta en cada númberu a artículos en llingua asturiana.

Ello ye que'l númberu de marzu de la Gaceta namás trai n'asturianu una de les sos 43 páxines, dalgo que s'entiende dende IAS que ye "un porcentaxe ridículu" anque la crítica del partíu políticu nun apara na edición en papel de la Gaceta, recordando qu'amás esta espárdese en formatos de partes de radio y TV, nos que la presencia del asturianu ye nula dafechu. Dende IAS recuérdase que "la Gaceta ye un mediu pagu por tolos ciudadanos de Xixón, que la encuesta sociollingüística de Llera Ramo diz que demanden una presencia digna y una mayor promoción pal asturianu de la existente"
.

Pa Izquierda Asturiana lo qu'asocede con "La Gaceta" ye un exemplu más de la política en materia de llingua que lleva'l gobiernu de PSOE-IX-BA, qu'entiende que nun ta faciendo nada pola normalización del asturianu. El portavoz d'IAS en Xixón, Pablo Rodríguez, fizo un llamáu a la conceyala de promoción del asturianu Carmen Rúa pa saber "si va a tomar dalguna midida p'aumentar la presencia de la llingua asturiana nos medios o si va a pasar como coles ordenances del asturianu, de les que nun se volvió a saber".