IAS denunció l'actitú del conceyu de Ribadeo

La polémica por la celebración de la I Escuela Fermín Penzol sigue criando tensión nel asturianismu. Tres de les declaraciones de cargos técnicos y políticos del Conceyu de Ribadeo na presentación de les xornaes, nes que llamentaron l'ausencia de Xeira y la Xunta Pola defensa de la Llingua de les mesmes interpretándola como un movimientu pa nun desagradar a l'Academia de la Llingua, el partíu políticu Izquierda Asturiana emitió una rempuesta calificando d'intolerable que dende un cargu públicu como la conceyalía de cultura del Ayuntamientu de Ribadeo se faigan les acusaciones que se fexeron. Pa IAS, lo que se dixo en Ribadeo ye "Criticar a una institución llingüística asturiana acusándola prácticamente de práctiques mafioses" en referencia a la idea de que l'ALLA desaprobaba tolo que nun podía controlar coles sos subvenciones, ello al empar que s'acusaba a "les organizaciones referenciales de defensa del asturianu y del gallego-asturianu" Xunta pola Defensa de la Llingua Asturiana y Xeira "de ser marionetes sin opinión propia" y mientres se defende l'actitú d'un Presidente, Tini Areces, que "ye'l más torgáu nel ámbitu de la defensa de los derechos llingüísticos y de la cultura de los asturianos de tola democracia".

IAS atalanta que tres de l'actitú del Conceyu de Ribadeo hai una "absoluta falta de respetu a Asturies" que vien "del nun aceptar que Galicia, les sos instituciones y partíos políticos nun pintan nel diseñu de la política llingüística asturiana" y que "da por supuesto que n'Asturies hai que denominar como gallegu toles variedaes más occidentales que nun pertenecen al dominiu llingüísticu asturianu. Otramiente, y énte la falta de rempuesta por parte de les instiuciones asturianes, el partíu llama a la "organización d'un movimientu ciudadanu qu'esconsoñe les concencies y acciones de los políticos" pa lo que llama a la participación na manifestación que convoca'l CAO'l día 5 de payares.