IAS denuncia la paralización de les ordenances del asturianu en Xixón

El partíu nacionalista Izquierda Asturiana (IAS) denunció esta mañana en comunicáu de prensa que l'equipu de gobiernu del conceyu de Xixón tien paralizaes dende va un añu les ordenances del usu del asturianu en conceyu ellaboraes pola Oficina de la Llingua y el so conseyu asesor, ello dempués de conocese los datos de la encuesta sociollingüística de Xixón, na qu'un un 63,5 % de los xixoneses se declaraben favorables a la oficialidá del asturianu.


Pablo Rodríguez, portavoz d'Izquierda Asturiana en Xixón, dixo al respective que " con disponer del testu de les ordenances dende va más d'un añu, los responsables del conceyu entovía nun llevaron el testu a Xunta de gobiernu, polo que too diz que nun tienen intención d'aprobales nin de debatiles en plenu" . Pa Pablo Rodríguez Alonso, "si yá ye grave la responsabilidá del PSOE nesti casu pola so atención y sensibilidá nules pa colos derechos d'una parte de los ciudadanos, la del so sociu de gobiernu IX--BA, ye entovía mayor en cuantes que nun sabe o nun quier facer respetar les promeses que-y fexo al so electoráu y a les que se comprometió al traviés de los alcuerdos de gobiernu".

Pablo Rodríguez afondó nes contradicciones que detectó n'IX-BA afirmando que "a la hora de la verdá, cuando tienen la posibilidá de tomar midíes reales y efectives pa la supervivencia de la nuestra llingua, la so dexadez ye absoluta,",. El portavoz d'IAS, carga la culpa sobe la conceyala responsable de los temes de llingua Carmen Rúa, a la qu'acusa de "enclicase a lo que-y dicte'l PSOE" y al so partíu, al qu'acusó de facer de "convidáu de piedra" nun momentu en que'l PSOE nun tien mayoría pa imponese en toles decisiones. Pa Pablo Rodríguez les Ordenances, con nun ser la oficialidá, ayuden a garantizar unos derechos llingüísticos que, visto lo visto, al PSOE y a IX-BA nun-yos da más por ellos.

L'apaición la selmana pasada de los datos de la encuesta sociollingüística de Xixón, na qu'un un 63,5 % de los xixoneses se declaraben favorables a la oficialidá del asturianu da-y al representante d'IAS pa reflexonar que les ordenances nun diben causar tensión social nenguna al empar que recuerda qu'otros conceyos como L.lena aprobaron normes asemeyaes a les que Xixón tien guardaes en caxón dende va ún añu.