IAS anuncia acciones llegales contra’l Rector pol asuntu de les tésis n’asturianu

El casu de Faustino Zapico, el profesor d'historia al que la Universidá d'Uviéu nun almitió la inscripción de la memoria de la so tésis doctoral por tar redactada n'asturianu, sigue dando que falar. Agora ye Izquierda Asturiana, el partíu políticu al que pertenez Faustino Zapico'l que se pronuncia sobre la cuestión. Nun comunicáu firmáu pol portavoz nacional de la organización, Ignaciu Llope, IAS quier mostrar la so "solidaridá y apoyu incondicional al nuestru compañeru de partíu" ente una situación que non por ser común ye menos grave y col aquello de que "ye una institución pública la que se convierte nun axente activu de discriminación, colo que se rebaxa y degrada la función que-y correspuende". La organización nacionalista da anuncia de que va amestase a les organizaciones que pongan pleitu contra'l Rector por nun almitir tésis n'asturianu

IAS declara que la situación pela que ta pasando Faustino Zapico muestra como la llingua asturiana ye un idioma "proscritu" y como los pasos que se dieron estos años pa la so normalización nun son a torgar estes situaciones de discriminación porque se dieron "na dirección enquivocada". El partíu políticu echa pel rector Juan Vázquez pol so talante autoritariu "que vien demostrando nesta y otres actuaciones" y pidió-yos a los dirixentes d'Izquierda Xunida - Bloque por Asturies que dexen "pa meyor momentu" lo que pa IAS son "xestos pa la galería" en referencia a les declaraciones de Valledor y Rafael Palacios sobre esti asuntu. IAS acusa a los dirixentes de IX-BA de da-y titulares a la prensa pa ganase la credibilidá que tienen perdida nel mundu asturianista como "cómplices necesarios d'un gobiernu que tien secuestraos llegalmente los derechos de les y los falantes d'asturianu" .