IAS améstase a la campaña contra la directiva Bolkenstein

La organización asturianista Izquierda Asturiana (IAS) convertióse esta selmana na primer entidá d'ámbitu asturianu en firmar el manifiestu de la campaña contra la directiva Bolkenstein, iniciativa que lleva'l nome del comisariu européu lliberal holandés Frits Bolkenstein que pretende que s'aprebe un proyectu de directiva europea sobre la llibre circulación de los servicios nos países de la Unión Europea.

Colectivos ciudadanos como ATTAC y OXFAM, sindicatos como la CGT francesa o partíos políticos como el Partíu Socialista de Bélxica, o el Partíu Comunista de Francia tamién faen parte d'esta campaña europea a la qu'IAS decidió amestase convirtiéndose na primer organización d'ámbitu asturianu n'axuntase a esta campaña na que tamién participen fuerces d'ámbitu estatal con presencia n'Asturies como Izquierda Xunida.

Según IAS, d'aprobase la directiva Bolkenstein tolos servicios suministraos na Unión Europea diben considerase como mercancía, "dalgo que va contra'l caltenimientu de los sistemes públicos de pensiones, les polítiques d'integración, el sistema sanitariu, o los derechos de los trabayadores consagraos poles distintes lleis nacionales". Ias defende tamién que la directiva Bolkenstein diba llevar a una "privatización del sistema educativu de los diferentes estaos" que supondría "una agresión a elementos fundamentales pa la cohesión social como la educación, la cultura, la sanidá o cualquier otru serviciu arreyáu a la protección social que pasaríen a tar suxetos a les formes de llibre competencia económica".

La organización asturiana diz que pa torgar l'efectu de la Directiva Bolkenstein ye preciso que'l campu de campu d'aplicación de la directiva se llimite y estreme ente los servicios d'interés públicu y otres clases de servicios. Pa blindar a aquellos servicios que garanticen la cohesión social nos distintos estaos como la sanidá, la educación, les pensiones o les polítiques dirixíes a les minoríes, ente otres midíes. Al nun precisar p'aprobase d'unanimidá ente los miembros de la UE, IAS camienta que ye precisa una gran movilización social pa torgar l'adopción d'esta Directiva "que supón un recule brutal nel bienvivir de la ciudadanía y que diba valir pa derromper el camín a futures midíes internacionales de corte neolliberal".