Iñarritu: “La reivindicación de la oficialidá ye xusta y necesaria”

El diputáu por Amaiur nel Congresu, Jon Iñarritu (Leioa, 1979), tuvo presente esta fin de selmana n’Asturies xunto colos sos socios en ‘Los Pueblos Deciden’, Andecha Astur. El vascu faló con Asturies.com tres la manifestación pola oficialidá.

 

¿Qué sensación tien tres participar nesta reivindicación?

 

Bona, mui bona. Vine colos compañeros de coalición a amosar la nuesa solidaridá y a acompañalos nesta reivindicación xusta y necesaria a favor de la diversidá llingüística y a favor de los derechos llingüísticos de los asturianofalantes.

 

¿Llama l’atención dende Euskadi la situación de la llingua asturiana?

 

Lo que nun m’entra na tiesta ye l’anomalía de que trenta años depués de l’aprobación y imposición del Estatutu d’Autonomía d’Asturies nun se reconociera esti patrimoniu y la so oficialidá, como sería lo normal. L’acoyida de los compañeros d’Andecha Astur y otres organizaciones foi escelente y tornaremos a Asturies pa otres reivindicaciones futures pol idioma.

 

La so axenda de la fin de selmana ye bien apertada.

 

Sí, son díes intensos nos que voi conocer tola problemática qu’hai n’Asturies, como la del puertu d’El Musel, un tema que llevamos nós al Parllamentu Européu y a Madrid. Reclamamos l’informe de la OLAF, que nun nos lo dan en Bruxeles, violando la llegalidá europea, y qu’agora vamos pidir al Gobiernu en Madrid, a ver si acceden a concedénoslu.

 

Ta en plena campaña de ‘Los Pueblos Deciden’, coalición a la que les encuestes dan-y un eurodiputáu.