Iñaki Urdangarin, acusáu d’esviar fondos públicos y privaos al traviés d’un entramáu societariu

La Fiscalía Anticorrupción acusa al duque de Palma, Iñaki Urdangarin, d’esviar fondos públicos y privaos al traviés d’un entramáu societariu. Pa ello establecíen precios “totalmente desproporcionaos” polos servicios emprestaos.
 
Supuestamente, el maríu de la Infanta Cristina y el que fora'l so sociu nel Institutu Nóos, Diego Torres, caciplaron un entramáu societariu cuando dambos taben al mandu d'esta entidá a cuenta d'apoderase de los fondos públicos y privaos que recibía, pa lo que fixaben precios "totalmente desproporcionaos" polos servicios qu'emprestaben a l'Alministración y simulaben, coles mesmes, trabayos "ficticios". Asina consta nel autu –al que tuvo accesu Europa Press– que dictó'l xuez instructor del casu Palma Arena pa ordenar la entrada y rexistru de delles de les sociedaes presuntamente implicaes nos fechos, tres dellos meses d'investigaciones, sobre'l supuestu esvíu de 2,3 millones d'euros que'l Govern de les Illes Balears, presidíu naquel momentu por Jaume Matas, destinó nel 2005 y 2006 a Nóos pa la celebración de dos foros sobre Turismu y Deporte.
 
La resolución xudicial asevera que’l preciu de dambes xornaes –1,2 millones la primera y 1,1, la segunda– ye "totalmente desproporcionáu pa lo que supón l'encargu" y fixóse "puramente en base a un presupuestu ficticiu". La Fiscalía apunta que "la finalidá única persiguida" por Urdangarin y Torres cola toma del control de Nóos yera "tener la cobertoria d'una asociación que formalmente nun buscaba ánimu d'arriquecimientu; una especie d'ONG dedicada a proyeutos sociales".