Iñaki Santianes saca a la cai’l so segundu discu, ‘Brehinks’

El gaiteru y direutor de la banda La Laguna del Torollu, Iñaki Santianes, ta acabante de sacar a la cai’l so segundu trabayu discográficu, ‘Brehinks’. L’uviedín va presentar el discu esti martes nel Club de Prensa Asturiana de la capital.

Según esplica Santianes, ‘Brehinks’ trátase d’un discu de gaita “diferente”, yá que nél amiéstense dellos estilos col oxetivu de sacar al instrumentu del so contestu tradicional. Pa esta creación, el tamién responsable de la delegación asturiana del Festival Interceltique de Lorient trabayó con temes compuestos pol madrilanu afincáu en Canarias Gonzalo Díaz Yerro basaos en melodíes cinematográfiques, el funky o la música discu. Amás, l’álbum inclúi una historia gráfica nel llibretu, obra d’Esteban Suárez, inspirada nes melodíes del discu, abriendo les puertes pa que cada persona que sienta los temes desendolque la so imaxinación, yá que “’Brehinks’ ye lo que tu quies que sía”, resalta Santianes.

Formáu por Vicente Prado ‘El Pravianu’, el gaiteru uviedín lleva tocando la gaita dende’l 1990, cuando tenía namái 8 años. Ente los munchos premios que ganó como gaiteru solista destaca’l Troféu MacCrimmon del 2005, enantes conocíu como Macallan, nel añu nel que precisamente camudaba la so denominación esti concursu de prestixu que se celebra dende’l 1986 nel Festival Interceltique de Lorient y nel que participen gallegos y asturianos interpretando melodíes bretones y de los dos países. Tamién nel 2005 asoleyó’l so primer discu, ‘Foncalada’, mentes que nel 2010 espublizó’l llibru ‘32 temas para el acompañamiento a la tonada asturiana con gaita’. La so formación musical completóla col títulu de grau superior de fagot nel Conservatoriu Superior de Música d’Uviéu y la diplomatura de Maxisteriu na especialidá d’Educación Musical pola Universidá d’Uviéu.

Esta tarde, a les 20 hores, Santianes va presentar el discu nel Club de Prensa Asturiana, actu nel que va tar acompañáu pol periodista y críticu musical Aurelio Argel. El gaiteru uviedín tamién interpretará dalgunos cantares de ‘Brehinks’ xunto con Andrés Alonso, que va tar al tecláu y a les programaciones.