Homenaxen a Ruiz de la Peña Solar con motivu de la so xubilación

El profesor Álvaro Ruiz de la Peña Solar va recibir un homenaxe del Institutu Feijoo d’Estudios del Sieglu XVIII y el Seminariu de Filoloxía Asturiana con motivu de la so xubilación. L’uvieín ye ún de los referentes nel estudiu de la lliteratura en llingua asturiana.

Autor de ‘Introducción a la literatura asturiana’ (1981)’, llibru clave nos estudios asturianísticos, Ruiz de la Peña desendolcó’l so llabor como profesor de Lliteratura na Universidá d’Uviéu y estudió fondamente la creación lliteraria en llingua asturiana, sobre manera dende una perspeutiva histórica, centrándos principalmente nos sieglos XVIII y XIX. D’igual forma, destaca como analista del Surdimientu y como críticu lliterariu.

L’Institutu Feijoo d’Estudios del Sieglu XVIII y el Seminariu de Filoloxía Asturiana entamen-y mañana un homenaxe, con presencia de compañeros y amigos, asina como del profesor Ramón Maruri (Universidad de Cantabria) y de destacaes autoridaes universitaries. Va ser a les 12 hores nel Paraninfu de la Universidá d’Uviéu, actu nel que tamién se va presentar el llibru ‘Estudios escogidos’ dedicáu a la so persona.