Homenaxe a la investigadora Concha Casado

La etnógrafa y filóloga lleonesa Concha Casado Lobato va ser oxetu d'un actu de reconocimientu a la so trayectoria investigadora, ello va tener llugar en Lleón el día 25 de marzu cola presentación del escritor José Luis Puerto.

Investigadora de la cultura y llingua tradicionales del norte de Lleón, Concha Casado dio a imprenta nel añu 1945 la so tesis doctoral entitulada "El habla de la Cabrera Alta: contribución al estudio del dialecto leonés" un llibru pioneru fechu baxo la dirección de Dámaso Alonso a partir de trabayos de campu nel pueblu de Trueitas y qu'afondaba nel estudiu del asturianu que se fala a la otra parte del cordal. L'Academia de la Llingua Asturiana volvió a editar apocayá la obra d'esta investigadora del CSIC agora yá retirada y que-y valió, xunto con otros trabayos que lleva tamién desendolcaos Concha Casado dende va más de cuarenta años p'acá nel ámbitu de la recuperación del patrimoniu etnográficu, el reconocimientu como Fía Adoptiva de La Cabreira.