Homenaxe a la bandina Aires del Palo esti vienres

L'asociación cultural El Rapigueiru entama esti vienres un
Ruxidoiru'l día 2 como homenaxe a la Bandina Aires del Palo, grupu que
lleva décades les fiestes de la zona d'Allande y qu'inda sigue n'activo.
Pa la ocasión hai previstes charres, pasucais un conciertu con delles
bandines, y por supuesto, los homenaxeaos Aires del Palo.



Aires del Palo ye una bandina del conceyu d'Allande que son toa un
institución nes fiestes d'aquella zona. La so formación de gaita,
curdión, bombu y redoblante pasió per bien de sitios, y siguen
faciéndolo inda anque dalgunos de los sos componentes pasen yá de
los 80 años. Tantos años paeció-yos a la banda de gaites
El Rapigueiru que merecíen un homenaxe, asina lo van facer esti vienres
dos de setiembre na Puela d'Allande.



L'homenaxe va entamar a les 18:00 hores con una charra de Xosé
Antón Ambás sobre'l folclor musical d'Allande, charra onde va
contar cola ayuda del vigulín de Dolfu Rodríguez y la xiblata de
Diego Pangua, que van facer muestres en directo d'esti folclor xunta
Ambás. Dempués de la charra l'homenaxe sal al aire con un
pasucais peles cais de la capital allandesa cola banda de gaites El Rapigueiru
y los músicos que más sero van participar nel conciertu homenaxe
nel chigre El Centro a eso de les 22:00 hores. Ellí van tocar La
Bandina'l Tombo, Los Llanzones y como non, Aires del Palo. La
organización quieren animar a tol mundu a tar nel homenaxe de la manera
que pueda caún , bien seya tocando, baillando o participando
namás nesti homenaxe a una parte viva del la tradición musical
asturiana.