Histórica

Miles de persones salieron a la cai esti sábadu n’Uviéu pa reclamar la oficialidá del asturianu y del gallego-asturiano, superando la respuesta d’abril del 2018. Una amuesa del ampliu respaldu social que tien esta vieya demanda nun momentu clave, cola reforma del Estatutu negociándose puertes adientro de la Xunta Xeneral.

Munchu coloríu, música y ilusión acompañó a la marcha pel percorríu habitual dende la Estación del Norte pela cai Uría hasta la plaza de la Catedral. Y xente, muncha xente, como demuestra’l fechu de que cuando la cabecera taba llegando al final de trayeutu empezaba a arrancar la cola de la manifestación.

La respuesta de la sociedá asturiana recordó a la del 1998, na marcha entamada pol Pautu pol Autogobiernu y la Oficialidá, y superó ampliamente a la d’hai 3 años, cuando la Xunta pola Defensa de la Llingua Asturiana (XDLA), convocante agora, cifró l’asistencia en 30.000 persones. Nesta ocasión contabilizaron “cerca de 50.000”.

Xosé María García ‘Llábana’ y una banderona d’Asturies y la Bandona Gaites pola Oficialidá abrieron la marcha, a la que siguieron les pancartes pola oficialidá del asturianu y del gallego-asturiano y les families, neñes y neños de Reciella. Llueu desfilaron les Pandereteres de la Oficialidá, enantes de dar pasu a les organizaciones sociales, partíos y coleutivos.

Llevaron pancarta Lliberales pola Oficialidá, los Mazcaritos d’Uviéu, Conceyu País Llionés y otru grupu de lleoneses con un baberu cola frase ‘Llión pola oficialidá. Güei Asturies, mañana nós. #Falamosigual’, SUATEA, #LluchandoPolaSoberanía, Darréu, Andecha Astur, CC OO, Mocedá Comunista, Izquierda Xunida (IX) y Iniciativa pol Asturianu. Viéronse banderes d’Izquierda Asturiana (IAS), Verdes EQUO Asturies y el Sindicato Astur Independiente (SAT), ente otros, mentes que zarraba la manifestación el Bloque Mozu, encabezaos pol camionetu d'Allana Sound System y presencia de Fiestes Populares y Bloque Críticu.

La conseyera de Cultura, Política Llingüística y Turismu, Berta Piñán acudió a la manifestación xunto con Antón García, direutor xeneral de Política Llingüística, mentes que la Executiva de la Federación Socialista Asturiana (FSA-PSOE) tuvo representada por María Luz Pontón. Podemos nun llevó pancarta, pero sí tuvo una amplia representación de políticos y militancia, con presencia de los diputaos Sofía Fernández Castañón, Daniel Ripa y Rafael Palacios.

La plaza de la Catedral, enllena

Un escenariu na plaza de la Catedral acoyó una pinchada de Fruela 757 mientres los miles de participantes na marcha diben llegando hasta enllenar el llugar dafechu. L’actriz María Cotiello y el presentador y meteorólogu David Arango lleeron el manifiestu de la XDLA, mentes que Rodrigo Cuevos peslló un actu que presentó la tamién actriz Natalia Suárez Ríos.

“La Xunta pola Defensa de la Llingua Asturiana va tiempu que dio a conocer la so propuesta d’artículu cuartu. Nun nos da más la redacción final exacta a la que lleguen los grupos parllamentarios siempre que recueya cuatro aspectos irrenunciables pa homologanos colos derechos que yá tienen otres comunidaes: primero, la oficialidá de les dos llingües propies d’Asturies, l’asturianu y el gallego-asturianu, al llau del castellanu; segundo, la garantía del derechu a conoceles y usales; tercero, el compromisu de qu’una llei de la Xunta Xeneral va desenvolver los términos y ámbitos d’usu oficial d’eses llingües; y cuarto, que nenguna persona va poder ser discriminada n’Asturies pola llingua que llibremente escueya pa comunicase”, demandó’l coleutivu cívico, qu’agradeció l’apoyu de la sociedá asturiana a les sos reivindicaciones.

D’igual forma, esixó que “el galego-asturiano ten que ter el mesmo reconocemento qu’a lingua asturiana. Y eso incluye qu’a lingua del estremo occidental se chame oficialmente col nome que ye dá toda a lexislación, el que leva nas súas normas ortográficas, el que defende el sou movemento de reivindicación y el qu’hasta hai dous días vía usando el Goberno asturiano. É el hora da seriedá, non das ocurrencias”.

“Falamos la llingua de los nuestros güelos y güeles, sí, pero queremos que seya la llingua de los nuestros nietos y nietes. Queremos que la decisión d’usar una llingua o otra respuenda a la opción individual de cada persona, ensin nengún estorbu llegal. Agora eso nun pue ser y tien que se solucionar. Los poderes públicos tán obligaos a poner los medios reconociendo la oficialidá d’asturianu y de gallego-asturianu. Na Xunta Xeneral hai mayoría abondo. Por fin, llegó la hora”, finó’l manifiestu d'una convocatoria que podría ser la última de demanda de la oficialidá.