Hip Hop na Casa Posafuelles

El chigre que la Xunta pola Defensa de la Llingua Asturiana tien n'Uviéu entama esti vienres un conciertu de K-Nalón. Esti grupu d'Hip-Hop n'asturianu toca nel Posafuelles gracies a la iniciativa de la Xunta Moza, asociación xuvenil qu'anguaño cumple 10 años.

El conciertu ye esti vienres día 13 a les 22:00 hores na Casa Posafuelles, que ta na cai Cuesta la Vega nº 10, y la entrada ye de baldre. K-Nalón ye ún d'esos grupos que ta dando-y puxu a la escena hiphopera d'Asturies, concretamente nes cuenques, onde l'ambiente del rap y l'hip-hop ta viviendo una gran vitalidá . K-Nalón vienen de Llangréu, llugar onde se xuntaron los sos componentes, el cantante Tori y l'encargáu de facer les bases Ceeris. Amás d'ellos dos, en K-Nalón tamién topamos a Arma X -cantante de Stoned Atmosphere- faciendo voces y al qu'ellos presenten como'l "nietu maricarme" trabayando nos platos. El grupu tien grabaos dellos cantares, que tán a disposición del tol mundu na so páxina web. Ellí, na so sección de descargues podemos ver una amuesa de lo que se ta moviendo n'Asturies nesti mundu del Hip-Hop, y conocer tamién a grupos como Testimoniu la Viztima que faen parte de les sos lletres n'asturianu. Otra manera de sentir rap fecho dende Asturies ye conectar cola canal de radio d'Asturies.com dedicáu al Hip-Hop y sentir a éstos y otros munchos grupos, anque la emisión inda ta en prebes.