Hidrocantábrico ganó 111 millones nel 2.002

La empresa d´eletricidá asturiana meyoró beneficiu nel 2002, añu en que tuvo un resultáu de 111 millones d´euros. Mientres que nel añu 2001 HidroCantábrico apurrió 74 millones de beneficiu, l'añu pasáu la ganancia medró nun 48% más. La cifra de negociu nel 2002 foi de 1.440 millones d´euros, con un cash-flow foi de 252 millones (36% más) y un resultáu operativu (EBIDTA) de 329 millones d´euros (28% más). Un bon resultáu anque nun incluya les consecuencies del procesu de fusión orixinada col cambéu accionarial. La alta tasa d'utilización de los grupos térmicos, que trabayaron a destayu tol añu, ayudó a esti bon resultáu en comparanza col del añu 2.001, en que l'alta tasa d'hidraulicidá llevó a una menor amortización de les centrales a carbón, que tienen más costos fixos

El Grupu HidroCantábrico restructuró nel 2002 la so cadarma accionarial asina como la financiera, aumentando la delda financiera del grupu en 2.000 millones d´euros como causa de la fusión d'HC con Adygensival, lasociedá qu'axunta los intereses de les empreses qu'entraron a la OPA sobre HC. Estes son la portuguesa EDP, l'alemana EnBW y Caxastur, quien anunciaron que'l repartu accionarial resultante de la compra va caltenese igual hasta l'añu 2.005

Na xera comercial la empresa aumentó la so cuota de mercáu en xeneración, algamando un 7,7% del total estatal, y per otru lláu HidroCantábrico Enerxía atropó 2.000 clientes más, colo que tien un 6,4% del mercáu. Nel exerciciu del 2002 tamién foi importante l'entamu de la comercialización del gas d'Arxelia, facturando nesti primer añu d´actividá a un centenar de clientes. Otamiente, la contrata con Renfe, el mayor consumidor de corriente del estáu, volvió a favorecer a la empresa asturiana, que va vender a los ferrocarriles el 30,48% del total del consumu que tengan nel 2.003