Hevia va pesllar la xunta estraordinaria de l’ALLA con motivu del Día de les Lletres Asturianes

El gaiteru maliayu José Ángel Hevia va actuar nel actu del uviéin Teatru Campoamor del 3 de mayu, XL Día de les Lletres Asturianes. Va poner el ramu a la xunta estraordinaria de l’Academia de la Llingua Asturiana (ALLA), na que la institución recibe como académicos a Pablo Texón y Alberto Fernández Costales.

El nuesu gaiteru más internacional, anguaño trunfando per tol mundu col so trabayu ‘Al son del indianu’, nel qu’amiesta sones asturianos con caribeños y llatinos, va facer una esbilla d’esti proyeutu na gran celebración de la lliteratura asturiana. Hevia va encargase de pesllar con un formatu tríu la xunta estraordinaria de l’ALLA pol Día de les Lletres Asturianes enantes de que s’interprete, como ye vezu, l’himnu del país.

Primero, a les 20.30 hores del vienres 3 de mayu, el cordionista Marcos García Alonso va encargase de poner les primeres notes musicales d’un eventu que van presentar un añu más Sonia Avellaneda y Próspero Morán. Tres la entrada de los académicos, Xosé Antón González Riaño, presidente de la institución, va recibir a los dos académicos nuevos, Texón y Fernández Costales.

Sobre l’escritor de Felechosa, l’ALLA destaca que “ye ún de los autores más renomaosde la lliteratura asturiana d’anguaño, ganador na pasada edición del premiu ‘Xuan María Acebal’ del Principáu d’Asturies col poemariu ‘Allumamientu’. Destaca tamién polos sos trabayos como narrador y traductor. Amás, ye lletrista de dellos grupos y cantautores asturianos”. Por último, apunta que “ye llicenciáu en Filoloxía Española y Especialista en Filoloxía Asturiana y collabora davezu con esta Academia como profesor de la Universidá Asturiana de Branu (UABRA)”.

Mientres, sobre’l xixonés resalta que “ye Doctor en Filoloxía Inglesa y profesor del Área de Didáutica de la Llingua y la Lliteratura dientro del Departamentu de Ciencies de la Educación de la Universidá d’Uviéu y coordinador del Programa de Doctoráu n’Educación y Psicoloxía. Como espertu en Sociollingüística, participó en dellos volúmenes con artículos al rodiu del asturianu”. Amás esplica que “collabora cola Academia de la Llingua como revisor de la revista Lletres Asturianes y dirixó dellos cursos na Universidá Asturiana de Branu (UABRA)”.

Esperáu discursu institucional

L’actu va siguir col esperáu discursu institucional de González Riaño, que va vivir el so segundu Día de les Lletres como presidente de l’ALLA. Darréu, y enantes de l’actuación d’Hevia, Avellaneda y Morán van recitar una esbilla de poemes incluyíos na espublización ‘Lliteratura 35’, editada en collaboración cola Fundación Municipal de Cultura d’Uviéu, que se centra nesta ocasión sobre manera nel panorama teatral n’Asturies.