Hevia tien que suspender una xira en Turquía

El gaiteru José Angel Hevia tuvo que suspender una mini-xira que tenía programada en Turquía pa últimos d'esti mes y primeros de marzu.El gaiteru maliayu y tola so banda nun van poder tocar en Turquía esti mes y el próximu. Los cuatro conciertos qu'había programaos van suspendese por recomendación de la propia organización de la xira, énte'l peligru inminente d'un ataque de los EE.U.U. al país vecín de Turquía, Irak. Hevia ya tuvo tocando en Turquía nel mes de xunu del añu pasáu, cuando fizo dos conciertos nel teatru Acikhava d'Estambul. L'éxitu d'estes dos actuaciones fizo que la organización turca entamara una xira per tol país, con feches el 24 febreru n'Estambul, 26 n'Ankara, 28 n'Izmir y rematando'l 3 marzu n'Adara. El peligru que supón tar nesi país en casu de qu'entame l'ataque a Irak fai que tantu los artistes como la organización coincidan en dexar la xira pa otru momentu de más tranquilidá na zona.Amás d'esto, lo mesmo'l gaiteru que tola so banda, espresaron un rechazu directu a esta guerra con un frase bien clara "¡¡¡ Meyor música que guerra !!!".