HC va facer un grupu a gas en La Ribera

Hidroeléctrica va invertir 360 millones na construcción del primeru de los dos grupos térmicos a gas que tenía anunciaos la empresa dende va tiempu en conceyu de La Ribera, onde anguaño HC opera trés grupos térmicos a carbón. El grupu que va construyise, con una potencia de 400 mw, va facese pa la otra oriella del ríu Nalón d'onde tan los grupos actuales y cuéntase con qu'eche a andar nel añu 2007. L'alcalde de La Ribera José Ramón García, el Presidente asturianu Vicente Álvarez Areces y el presidente d'Hidrocantábrico Manuel Menéndez roblaron ayeri l'alcuerdu pa la construcción d'esta central, que va ser la primera a gas que se faiga n'Asturies. L'alcuerdu acaba cola oposición del alcalde de La Ribera, que se quexó siempre de la torga al crecimientu urbanísticu del conceyu que suponíen les llinies d'alta tensión que salíen de la planta d'HC.

D'otra manera, esti alcuerdu garantiza la construcción d'un grupu y dexa la construcción d'un segundu grupu ximielgu d'otros 400 mw a espenses de la construcción de nueves llinies d'alta tensión pa evacuar la corriente fuera d'Asturies y a la llegada d'infraestructures nueves qu'apurran el volume de gas que precisaría esti segundu grupu, en cuantes que l'abastecimientu de gas del primer grupu queda garantizáu cola presencia del gasoductu que pasa pel llugar y la salida de la corriente del mesmu queda tamién garantizada cola esistencia de les llinies actuales. Cola entrada en serviciu de los dos grupos, el consumu de gas d'Asturies multiplicaríase por trés.