HC medra en Retecal

El grupu Hidroeléctrica, titular del operador de telecomunicaciones asturianu Telecable, ta pa facese con una tayada grande n'ampliación de capital de Retecal, l'operador de cable de Castiella y Llión, onde HC yá tien de magar se fundó la empresa'l 30% del capital, un porcentaxe que podría medrar abondo gracies al alcuerdu d'intenciones que tien con Caxa España pol que HC fadríase col poder na empresa, medrando nel accionariáu y repartiéndose cola entidá financiera los cargos nel conseyu d'alministración. Retecal enfrenta una ampliación de capital por importe de 5.000 millones de pesetes, una cantidá pequena al tenor del tamañu de la empresa, pero ello ye que tres l'ampliación parez qu'hai intereses políticos arriendes de los empresariales. Los periódicos de la comunidá vecina ven na operación un intentu p'achicar de la presidencia de la empresa a José Luis Ulibarri, que nun alcontró munchu sofitu a laso xestión, dificultada pol enfrentamientu que tien cola Conseyera d'industria. LLama l'atención que'l Gobiernu autonómicu castellanu y Caxa España, partes interesaes nel futuru de Retecal, prácticamente nun contrataron nada cola empresa.