HazteOir moviliza na rede contra l'asturianu les firmes de la ultraderecha española

Los sectores contrarios a la cooficialidá recueyen firmes na rede fuera d'Asturies apoyaos na estructura de CitizenGo.

Ésta trátase d'una fundación entamada por HazteOir qu'actúa n'España y l'Ámérica hispanofalante.

Dende hai dellos meses los sectores movilizaos contra la igualdá de derechos llingüísticos n'Asturies tán recoyendo firmes na rede dende la plataforma on-line de CitizenGO, una fundación qu’entama en 2013 l’asociación HazteOir, inspirada na plataforma conservadora americana MoveOn.org.

Ente les iniciatives de CitizenGo, toes de triba ultraconservadora, la plataforma promueve protestes contra l’albuertu, el matrimoniu ente persones del mesmu sexu o, nesti casu, la llingua asturiana que yá firmaron, siempre según la plataforma, más de 11.000 persones.

Esta plataforma, qu’entamó actuando nel ámbitu español y agora tien yá ámbitu global, con firmantes de les sos campañes especialmente nel entornu hispanofalante, defínese como una comunidá ciudadana activa de peticiones na rede y otres aiciones pa defender “la vida, la familia y la llibertá”.

Amás d’esta petición contra la reconocencia de los derechos llingüísticos n’Asturies, que ta espardiendose en redes sociales dende decenes de perfiles de persones y organizaciones ultraderechistes y neoconsevadores españoles, Citizengo tien promovío otres campañes extravagantes con cierta sonadía como la petición contra la celebración de una misa negra en Oklahoma City en 2014.