Hasta seis centros de Secundaria siguen ensin maestru de Llingua Asturiana

|
Hasta seis centros de Secundaria siguen ensin maestru de Llingua Asturiana

Iniciativa pol Asturianu tien constancia de la esistencia de seis centros de Secundaria que dos meses depués del comienzu del cursu siguen ensin maestru de Llingua Asturiana. Esixe a la Conseyería d’Educación y Cultura qu’abra les llistes de profesoráu.

“Nesti momentu la situación ye mui grave porque tenemos a grupos d’alumnáu ensin profesor a lo llargo de más de dos meses de cursu y ensin horizonte de solución a curtiu plazu y por ello reclamamos a la conseyería que tome midíes de manera urxente” apunta Inaciu Galán, presidente d’esta asociación. Amás de l’apertura de llistes, anguaño escosaes, “proponemos aumentar les places d’asturianu nel máster de profesoráu de Secundaria”, pa lo que yá se punxo en contautu cola Universidá d’Uviéu de cara a doblales pal cursu qu’entra.

“Ye importante amás que les places d’asturianu dexen de ser, mayoritariamente, medies xornaes de tal manera que dalgunes places que s’asitien en conceyos alloñaos del centru d’Asturies seyan más atractives pa la escoyeta”, añade. El problema que se da nos centros públicos vese tamién espeyáu nos centros concertaos onde tamién numberosos colexos siguen ensin profesoráu d’asturianu.

 “Como cada añu, la conseyería retrasa la llegada del profesor d’asturianu y otorga menos hores de les que tien d’impartir el docente al centru, de tal manera que tán dándose situaciones tamién de falta de profesoráu na etapa Infantil, onde la propia conseyería d’Educación afirmó que diba garantizase nesti cursu que l’asignatura d’asturianu diba tener una presencia normal nesos niveles”, esplica.

Necesidá de la especialidá docente

Galán califica esti asuntu de “mui grave”, yá que provoca “que nun haya una verdadera llibertá a la hora d’estudiar asturianu”. El presidente d’Iniciativa pol Asturianu esplica que se da “poles condiciones llamentables nes que vive'l profesoráu de Llingua Asturiana, ensin poder acceder a unes oposiciones y siempres como profesoráu interín”.

Poro, afirma que “agora que tanto n'Asturies como en Madrid gobierna'l PSOE, nun hai razón nin escusa pa nun poner reconocer yá la especialidá d'asturianu nel decretu correspondiente, un cambiu bien cenciellu y que nun supón coste dalgún”.

Contador Estadistiques