“Hai que ser valientes; agora ye’l momentu”, tresllada Ripa a Barbón, que respuende que “la prioridá nun ye la reforma del Estatutu”

El secretariu xeneral de Podemos y voceru, Daniel Ripa, usó l’asturianu na segunda sesión del alderique d’orientación política pa falar de derechos llingüísticos y la reforma del Estatutu. “Hai que ser valientes; agora ye’l momentu”, treslladó a Adrián Barbón, que-y respondió que “la prioridá nun ye la reforma del Estatutu” que, añadió, “nun pue plantegase como oficialidá sí, oficialidá non”.

“La oficialidá del asturianu y del gallego-asturiano ye un derechu de miles de persones que ven discriminada la so vida, y l’ausencia d’esti derechu dexa a los asturianos y asturianes como ciudadanos y ciudadanes de segunda”, principió Ripa, que recordó que “conquistar esi derechu nun ye ser d’izquierdes nin de dereches, ye un llogru p'Asturies”. Ufrió al presidente diálogu y pautar tiempos, “pero la reforma del Estatutu tien que se facer nesta llexislatura

“Too ye negociable, sacante los derechos de la xente”, siguió, “por eso nun se pue dilatar la oficialidá nin una llexislatura más. Hai quien diz que la pandemia ye incompatible cola oficialidá; paeznos lo contrario: la reconstrucción d’Asturies necesita d’una reforma del Estatutu pa blindar derechos y axustar competencies. Precisamente la pandemia fai necesario actualizar les nueses normes”.

El diputáu tamién afaló a “trabayar en paralelu por incrementar la inversión pa les y los creadores n’asturianu y gallego-asturiano, la presencia na TPA y el sofitu del asturianu na escuela”. “Presidentes, señoríes, hai que ser valientes; agora ye’l momentu”, finó la so intervención.

“Nun arrenunciamos a nada”

Na so réplica, Barbón, en castellanu, respondió-y que “nun arrenunciamos a nada, pero tampoco engañamos a naide. Nestos momentos la prioridá nun ye ésa. La prioridá nun pue ser, non la oficialidá, non, la reforma del Estatutu, porque vusté confunde términos. Fala de la reforma del Estatutu y de la oficialidá como si fora lo único qu’hai que tocar, y ye qu’hai que tocar más coses. Por exemplu, vímoslo, un instrumentu llegal que tienen munches comunidaes autónomes que nós nun tenemos ye’l decretu-llei, que se convirtió nun instrumentu útil como respuesta a la pandemia qu’equí nun lu tenemos reguláu”.

“¿Creemos qu’hai que dir hacia una reforma del Estatutu? Sí. ¿Creemos qu’agora mesmo, en medio d’una pandemia, na segunda fola, cola situación de crisis que se nos vien enriba, ye’l momentu d’abordar la reforma del Estatutu? Yo-y digo que lo prudente paez que non ¿Arrenunciamos a que sía nesta llexislatura? En mou dalgún. Nós nun arrenunciamos a nengún de los nuesos compromisos ellectorales y creo que lo demostramos”, espresó darréu’l presidente.

Una propuesta más amplia

Ripa, por último, recordó, agora en castellanu, al socialista sobre la reforma del Estatutu que “creemos que ye parte del alderique de reconstrucción. Lo que queremos dicir ye qu’hai ferramientes nun Estatutu que tienen qu’ayudar a la reconstrucción”. Llueu insistió en que, amás de pa declarar la oficialidá, la propuesta del so partíu busca tamién “ameyorar competencies, tener más blindaxe social de derechos y tener más capacidá de tener competencies nel terrén económicu, o n’otru tipu de terrenos, pa poder afrontar con más velocidá la salida de la crisis”.

Na imaxe, Ripa nuna de les sos intervenciones esta mañana nel alderique d'orientación política. Semeya obra d'Iván G. Fernández.