"Hai pinos que son autóctonos tanto o más qu'otres especies conocíes", afirma Blanco de la Parte

Ente un sector ampliu de la población hai cierta creencia sobre los pinos como árboles alóctonos n'Asturies, pero nun ye asina. "Hai dellos pinos que son autóctonos tanto o más qu'otres especies conocíes" como fayes o carbayos, afirma l'inxenieru de montes Adolfo Blanco de la Parte, que cita'l pinu 'sylvestris' y el pinaster.

"N'Asturies atopamos coníferes autóctones como'l texu, los cipreses (a 1.800 metros, en pisos subalpinos) y los pinos", esplica l'espertu, qu'apunta que los silvestres danse más nel cordal y los pinaster, tamién conocíos como 'del país', na mariña, sobre manera nel centru y l’occidente. Sicasí, nes décades de los 40, 50 y 60 entamen les repoblaciones de montes con estes dos especies y con otra otra especie de pinu, el radiata o insigne, procedente de la bahía de Monterrey (México), "que tien mui buen crecimientu pa madera". Estes trés especies son les que tienen una representación territorial más importante n’Asturies.

"La decisión téunica de llantar pinos foi acertada naquel momentu", considera Blanco de la Parte, al ser árboles "pocu esixentes pa coles condiciones del suelu, como especies colonizadores que son, dende‘l puntu de vista de la ecoloxía forestal". Ello fai que sían enforma afayadizos pa restauración hidrolóxico-forestal de cuenques y terrenos esfarrapaos depués de quemes repetíes, magar que falte agua o caltrie abondo‘l fríu o la calor.

La idea medró na década de los 80

Nos años 80 foi cuando s'empezó a estender principalmente la idea de que'l pinu yera una especie alóctona, dalgo que los rexistros polínicos demuestren que nun ye asina. En turberes como la de Dueñas en Cuideiru, en Ḷḷeitariegos, na vega de Comeya nel Cornión, nos castros de La Campa Torres, del Chao Sanmartín en Grandas o en Camoca en Maliayu, atópense evidencies que nos permiten saber que depués de la última glaciación (10.000 años B.P.) "había pinu silvestre a retorcer" n'Asturies, y qu’esa superficie va evolucionando, dando pasu después a frondoses caducifolies, entamando a menguar dafechu col entamu del bronce atlanticu (3.250 años B.P.).

Ello dio pasu a un esporpolle bultable de les ericacies, como‘l gurbiezu y les cádabes, indicadores nidios de la llegada del usu del fueu poles comunidaes humanes nesi momento n'espansión. Lo mesmo espeya la toponimia, con escomanaes referencies per tol país a 'piñera', 'piñeres', 'piñeras', 'piñeira', 'piñeiro', "que según Xosé Lluis García Arias fadríen referencia a pinos".

Poro, pue afirmase "que los pinos son autóctonos tanto o más qu'otres especies conocíes", como fayes o carbayos. Árboles que son "mui interesantes pa restaurar espacios con suelos degradaos, poles quemes " y que tienen y tuvieren una bultable importancia económica, "como se sabe pol aprovechamientu de madera, pero también nel emplegu de la resina na carpintería de ribera y la navegación en xeneral, enantes d’apaecer los derivaos del petroleu", apunta l'inxenieru de montes. Nel casu de la restauración hidrolóxicu-forestal esplica cómo "depués de la plantación d'abedurios y pinos, que son especies con una estratexa ecolóxica colonizadora y que son quien a medrar nestos suelos pocu evolucionaos, la dinámica de sucesión forestal da pasu a especies más tolerantes a la solombra (en escala temporal forestal) y más desixentes en suelos como los carbayos, los fresnos, los pláganos o les fayes". Al rodiu d'ello, señala que nos 80 "dende la defensa ambiental metióse la pata por completu al considerar dellos pinos por alóctonos y esparder la idea de que polo tantu yeren dañibles".

A diferencia de la castañal, que también se consideró como alóctona hasta hai bien poco n' Asturies y, polo tanto, ya se sabe que nun la traxeron los romanos, el pinu silvestre sí ye consideráu ya pola Alministración como propiu del país en dellos documentos de xesión del territoriu. Asina, el silvestre ta incluyíu como tal nos instrumentos de xestión integrada de los parques naturales de Ponga, Redes y Penubina-La Mesa, cola esceición del de Somiedu "cuando sí los hai de rexeneración natural en cotes mui altes", según Blanco de la Parte, y nel de Fuentes del Narcea, onde se considera especie susceptible d’emplegu na restauración.

Na semeya, piñera nel Remelendi (Casu). Al fondu, Picos y el Tiatordos.