¿Ha ser el 25 de mayu’l Día de la Bandera?

El presidente Adrián Barbón vien refiriéndose al 25 de mayu como’l Día de la Bandera, una fecha que considera complementaria al 8 de setiembre. N’Asturies.com falamos con Faustino Zapico, Pilar Sánchez Vicente y Ignaciu Llope pa conocer la so opinión sobre esta definición pa lo que pa munchos debería ser el Día d’Asturies.

“Paezme un intentu de dar visibilidá al 25 de mayu, ensin atrevese a abrir un debate sobre’l Día d’Asturies, afitáu na memoria coleutiva a la batalla”, apunta Zapico, que considera bona esa visiblidá porque “yera una fecha que pasaba desapercibida, desconocida pa munchos asturianos”. Asina nun refuga “un Día d’Asturies bis; ye una idea que nun ta mal llevada”.

Sicasí, cree que Barbón “habría ser más valiente” y plantegar esi alderique sobre’l Día d’Asturies, al tiempu que censura la so presencia del na misa de Cuadonga. “Paezme terrible”, señala, una idea que comparte Sánchez Vicente.

La tamién historiadora sentencia que’l 25 de mayu “ye Día d’Asturies o nun ye”. Refuga cualquier componente relixosu pa la celebración del país y apunta que quedar col Día de la Bandera “ye quedar cola cruz”.

Llope, pela so parte, considera que supón “dotar al 25-M d’un componente simbólicu pa construyir un discursu d’identidá asturiana dende un proyeutu de comunidá cívica, republicana y radicalmente democrática”. Tamién cree que “dignifica a la bandera asturiana como símbolu del país”, anque avisa del peligru de nun entender cualquier enseña como “un elementu simbólicu que nun ye un instrumentu pa danos con ella na cabeza”, como asocede cola española.

Nun refuga’l médicu psiquiatra y escritor el 8 de setiembre, “fecha que nun debe ser abandonada. Al covadonguismu hai que combatilu in situ, cara a cara, esi mesmu día”, entiende, resignificando dicha celebración.

Na semeya, Barbón fai una reverencia a la enseña del país nel actu institucional pol 25-M.