Héctor Braga lleva la música asturiana a Suiza xunto con La Bandina’l Bache

La música del país va sonar esta fin de selmana en Suiza de la mano d’Héctor Braga y La Bandina’l Bache. El cuartetu tradicional va ufrir delles actuaciones na ciudá de Genève, onde hai una colonia asturiana amplia, y na so redolada.

Ésta nun ye la primer vegada que Braga se desplaza a la población asitiada xunto a la frontera col Estáu francés pa tocar frente al públicu llocal y asturianu residente nel llugar. Nesta ocasión, el de Llangréu va actuar con La Bandina’l Bache pa intepretar asturianaes, romances, xácares, cantares y música de baille. Los conciertos van tener llugar mañana, el sábadu y el domingu en dellos puntos de Genève.

Tres estes actuaciones en Suiza, el músicu asturianu va tener una axenda cargada de conciertos. El vienres 28 va llevar la so música a la Casa de Cultura de Mieres nel actu d’entrega de gallardones Silvino Argüelles (20 hores) y el sábadu 29 na Casa Cultura de Llugones (19 hores). Mentes, n’ochobre va actuar en Xixón (día 5) y La Felguera (díes 7, 13 y 18).