Gwendal va facer parada en L'Infiestu na xira pol so 50 aniversariu

Piloña va acoyer un festival nuevu al rodiu la música de raigañu celta: el Folixa nel Paraísu.

La presencia de Gwendal en L'Infiestu va ser el reclamu principal d'esti certame que va desendolcase del 12 al 15 d'agostu. Centráu na cultura celta, van programar dellos conciertos, un mercáu y delles actividaes, como xuegos tradicionales.

El cartelu musical va tar compuestu, amás de pola histórica banda bretona, que celebra esti 2022 la xira pol so cincuentenu aniversariu, polos escoceses Gnoss, los gallegos Andrés Penabad y Rubén Díaz, el vascu Xabi Aburruzaga, el tríu asturandaluz Deira, Rubén Alba, Fontoria y Sceal, ésti últimu con integrantes de dientro y de fuera d'Asturies. Toles actividaes van ser de baldre y va habilitase una zona d'acampada pa la xente que se desplace de fuera de Piloña.