Gustavo Bueno llama a IX “ONG del bable”

La mecha que prendiere l'otru día l'economista Juan Velarde, qu'acusó a Izquierda Xunida de pretender obligar a los fíos de los obreros a estudiar una "llingua inutil como ye'l bable" sigue prendida.

Dempués de que Valledor cortare pela freba les acusaciones de Velarde, al que retrató como un "especimen del antiguu reximen" en referencia al so ascensu académicu y social en tiempos de la dictadura de Franco, qu'intentaba amás "pontificar dende la ignorancia", agora son el mesmu Velarde, Gustavo Bueno y tamién Fernando Fernández Méndez de Andés, participante nos cursos de La Granda, los qu'echen pel asturianu y per Izquierda Xunida.

No tocante a Juan Velarde, el septuaxenariu economista de Salas declaró que'l "que retruca con insultos ta descalificándose'l solu" y qu'elli nun tenía más que dicir, pero un vieyu compañeru de Velarde nos cursos de La Granda como foi Gustavo Bueno sí que tenía daqué más que dicir. El diariu La Nueva España asoleyaba asina les declaraciones del miembru de "amigos de los bables" que diz que llamar a Velarde "especime del Antiguu Réxime" ye daqué "fuera de llugar y que descalifica al mesmu Valledor" y que en cualquier casu, y asumiendo que dende los sos puntos de vista respectivos Velarde y Valledor tuvieren razón había que ver "que tenía más pesu, si un argumentu dende'l puntu de vista d'España o dende'l d'una ONG folclórica como IX".

Tamién dende los Cursos de La Granda, y igualmente dende les páxines de La Nueva España, l'economista Fernando Fernández Méndez de Andés declaró que concueyaba con Velarde en cuantes que "importa más el inglés pal futuru d'Asturies que miranos l'embeligu". Profesor de la Universidá Antonio de Nebrija y participante nos debates del programa d'Ana Rosa Quintana en Telecinco, Méndez de Andés declaró que "los oficialistes de la llingua en cuenta de recuperar esencies construyen realidaes distintes".

Los alfiles políticos d'IX y del PSOE tamién entraron nel tableru de xuegu abiertu poles declaraciones de Velarde. Pela banda d'IX Jesús Iglesias aseló l'enfrentamientu declarando que "Velarde nun ye una autoridá en materia llingüística" encamentándolu a opinar más d'economía. Pel PSOE Fernando Lastra declaró que lo interesante yera conocer la postura real del PP nel tema del asturianu y non el que discutieren Velarde y Valledor.