Grupos ambientales y sociales piden a Álvarez-Cascos nuna carta alternatives a la incineradora

Un total de diez grupos ambientales y sociales unviaron el miércoles una carta a Francisco Álvarez-Cascos, presidente d’Asturies, pa solicita-y una reunión. L’oxetivu ye tratar alternatives a la incineración de residuos.
 
La carta entama señalando l’esmolecimientu d’estos grupos “poles polítiques que pretenden marcar el futuru de la xestión de los Residuos Sólidos Urbanos n’Asturies”, pa depués destacar que “ye pública la postura que coleutivos de ganaderos, agricultores, consumidores, ecoloxistes, vecinos y sindicatos d’Asturies mantienen frente a soluciones finalistes pa la xestión de la nuesa basoria, como ye la incineración”. N’opinión de los firmantes, “trátase del peor métodu de tratamientu por ser la téunica más costosa no económico, perxudicial pa la salú y el mediu ambiente, y la que menos emplegu xenera. Amás, la so implantación supondrá un frenu per décades a la implantación de polítiques basaes na reducción, reutilización y reciclaxe”.
 
Darréu, comuniquen al presidente que “son munches les alternatives a la planta incineradora qu’esisten” y soliciten una reunión pa esplicales en persona a Álvarez-Cascos col oxetivu final de convencelu pa que frene la construcción de la planta nes instalaciones de Coxersa en Serín. Los diez coleutivos que sofiten esti mensaxe son l’Asociación de Ganaderos y Afectaos pola Incineradora, Asociación pa la Defensa de la Sanidá Pública d’Asturies, COAG, Confederación d’Asociaciones Vecinales d’Asturies (Cavastur), Coordinadora Ecoloxista d´Asturies, Ecoloxistes n’Aición Asturiaes, Federación d’Asociaciones de Vecinos de la Zona Rural de Xixón ‘Les Caseríes’, Greenpeace, Organización de Productores de Leche (OPL) y UCE-Asturies.