Grupos ambientales reclamen la convocatoria del Patronatu de Penubina-La Mesa cuatro años depués

La Conseyería d'Agroganadería incumple la normativa qu’obliga a convocar al Patronatu del Parque Natural de Penubina-La Mesa una vez al añu, según alerten doce grupos ambientales. La reunión última tuvo llugar nel 2009.

“A los grupos ecoloxistes nun mos paez aceptable que nun se convoque la Xunta mientres cuatro años consecutivos, nin mos paez axustáu al decretu regulador”, afirmen nun comunicáu, pa depúes señalar que nesti tiempu aprobáronse y executáronse “inversiones mui discutibles nel espaciu natural” y “deterioróse l’atención al públicu”. D’igual forma, demanden “tresparencia” y l’accesu a tola información referente al parque natural asitiáu nos conceyos de Teberga, Quirós y Ḷḷena, n’especial pol anunciáu cambiu del Plan Rector d’Usu y Xestión-Plan de Desarrollu Sostenible (PRUX-PDS), del que tovía nun se conoz el conteníu.

Dada esta situación, esta docena de grupos ambientales treslladaron per escrito al Gobiernu una quexa formal na que soliciten la convocatoria de los órganos de participación conforme a la lexislación específica y na que tamién reclamen l’accesu a les estadístiques del Parque  Natural de Penubina-La Mesa dende 2010 hasta anguaño xunto cola rellación añal d’inversiones y gastos fechos nesti tiempu. Les formaciones que sofiten esta reclamación son la Coordinadora Ecoloxista d’Asturies, el Colectivo Ecologista de Avilés, la Plataforma por la Defensa de la Cordillera Cantábrica, l’Asociación para la Conservación y Estudio del Lobo (ASCEL), l’Instituto para la Calidad y la Educación Ambiental (INSCEAM), l’Asociación Verdes Asturianos, Ecoloxistes n’Aición d’Asturies, el Grupu d’Ornitoloxía Mavea, l’Asociación Medioambiental La Cirigüeña, SOS Cuideiru, l’Asociación para la Defensa Jurídica del Medio Ambiente-ULEX y  l’Asociación de Amigos de la Naturaleza Asturiana (ANA).