Greenpeace y dellos coleutivos asturianos continúen cola llucha contra la incineradora de Serín

La llucha ciudadana contra la incineradora nun para. Representantes de Greenpeace y de dellos coleutivos del país van reunise esti llunes con una delegación del Bancu Européu d’Inversiones (BEI) pa que nun financie la planta.
 
La reunión va tener como sede l’Auditoriu Príncipe Felipe d’Uviéu y nella Greenpeace, y otres organizaciones ciudadanes, sindicales, agraries, polítiques y ecoloxistes asturianes, van esponer a los miembros del BEI los argumentos que desaconseyen la construcción d'una gran incineradora de residuos sólidos urbanos n'Asturies. El Bancu tien pendiente aprobar un creitu de 125 millones d'euros que valdría pa pagar la metá del costu del proyectu.
 
Según informen dende Greenpeace, esti alcuentru va valir pa que la entidá europea conoza de primer mano cuála ye la situación real d'un proyectu que "goza d'ampliu refugu social” en tol país, y qu'amás “tien alternatives más económiques y respetuoses cola salú y el mediu ambiente". Pa Julio Barea, responsable de la campaña de contaminación de Greenpeace, la construcción de la incineradora de Serín “pon n'evidencia la llamentable política de xestión de residuos que dellos políticos llevaron a cabu mientres años n'Asturies".