Greenpeace xubila’l ‘Rainbow Warrior II’, que va permanecer en Bangladesh como barcu-hospital

|

Tres 22 años d’actividá, el ‘Rainbow Warrior II’ de Greenpeace dexa de percorrer los mares del mundu y pasa a ayudar a la población de Bangladesh. La embarcación va convertise nun barcu-hospital pa dar serviciu a la ONG Friendship.
 
Esti martes tuvo llugar en Singapur el cambiu de titularidá del ‘Rainbow Warrior II’, que va pasar a a nomase ‘Rongdhonu’, nome en bengalí pa referise al arcu la vieya, manteniendo asina l’espíritu de la denominación d’esti barcu históricu símbolu de la llucha pola conservación del mediu ambiente y los mares. A partir d’agora, el barcu va tar atracáu nel golfu de Bengala pa dar atención primaria, secundaria y urxente a la población de la zona, que nun tien accesu a les necesidaes sanitaries básiques. Amás, Friendship, que dispón d’otres dos embarcaciones, tamién tien previsto utilizalu pa llevar ayuda médica a la zona en situaciones d’emerxencia.
 
El ‘Rainbow Warrior II’ foi’l barcu que sustituyó nel 1989 al orixinal ‘Rainbow Warrior’, fundíu nel 1985 tres un bombardéu por parte d’axentes del Gobiernu francés. Per más de dos décades, convirtióse nel alma de Greenpeace pa, de manera pacífica, denunciar y tratar d’evitar crímenes medioambientales como pruebes nucleares, unvíos de madera illegal, la sobrepesca o la caza de ballenes, ente otros. Amás, sirvió para treslladar ayuda humanitarios a los afectaos pol tsunami del 2004 nel sudeste asiáticu y fixo muestreos de radiación na catástrofe nuclear de Fukushima. Agora, otru barcu, el ‘Rainbow Warrior III’, en construcción, va pasar a facer les funciones del so predecesor. La intención de Greenpeace ye la de botalu n’ochobre coincidiendo col 40 aniversariu de la organización ecoloxista.

Contador Estadistiques