Greenpeace ve un puntu negru n'El Musel

La prestixosa organización ecoloxista internacional presentó ayeri l'informe "destrucción a toda costa" nel que recueyen les agresiones más graves a la costa en tol estáu español. Nel separtáu dedicáu a Asturies, Greenpeace detecta cuatro puntos de preocupación ente los que rescampla'l proyectu d'ampliación del Puertu del Musel en Xixón, que merez pa Greenpeace la calificación de "puntu negru" (ún de los 31 qu'alcuentren en tola costa española) polos sos efectos negativos sobre tola parte de la Playa San Llorienzu, que tendría de rellenase artificialmente con más de 300.000 metros cúbicos d'arena y qu'amás yá tien que soportar la presencia del cascu fundíu del "Castillo de Salas". L'antropización intrusiva que supón la construcción de la "senda costera" nel centru-occidente y la contaminación na ría d'Avilés xunta la parte'l sablón del Espartal son los otros puntos que señala Greenpeace nel so informe.