Greenpeace denuncia que la construcción va afogar la costa asturiana

La organización conservacionista internacional asoleyó esta selmana l'informe añal "destrucción a toa costa". Polo que-y toca a Asturies, la construcción masiva de xalés na costa, la saca d'Arena en Vidíu y la obra del Musel son los puntos negros de más pesu.

El mediu millón de metros cúbicos de sable que se sacaron del Cabu Vidíu, en Cuideiru pa rellenar con ello les playes de Salinas y San Xuan ye ún de los puntos negros que rexistra Greenpeace nel so repasu añal a la nuestra costa. Xunta esta agresión, que yá ta fecha, la organización denuncia que d'enfrente de Xixón cuenten con dragase otros 22.000 metros cúbicos pa rellenar con ello los espigones del puertu d'El Musel. Al paecer de Greenpeace, estes dos actuaciones, que suponen un dañu gravísimu al mediu ambiente marinu, tocando caladeros de pesca de gran importancia, débense a un furacu llegal na Llei de Puertos española. Greenpeace sorraya la especial gravedá del casu de Cuideiru, onde acusa al Gobiernu asturianu de nun saber defender los sos recursos pesqueros nun llugar onde l'Institutu Oceanográficu diz que se da una presencia grande d'especies d'interés pa la pesca.

Xunta'l casu de les saques de sable, Greenpeace prende l'alarma n'otru puntu que tá fuera del agua pero que toca directamente col aspectu de la costa, como ye la xuba de la presión inmobiliaria nos conceyos de la costa asturiana. Greenpeace llama l'atención sobre'l desembarcu n'Asturies d'empreses constructores que trabayaben primero pa la parte del mediterráneu y qu'agora ven nel cantábricu un frente nuevu pel qu'espardese. En concreto, los casos más sangrinos de presión inmobiliaria sobre la costa son pa Greenpeace los de Ribseya, onde ta previsto construyir más de 9.000 viviendes, y Llanes, con otres 1.200 sobre una costa yá mui estragada de construcciones. El sector públicu tamién tien daqué de responsabilidá nesta presión cementera sobre la costa astur, y asina Greenpeace llamenta la intención del Gobiernu asturianu de convertir tola costa asturiana nun gran paséu peonil de 500 kilómetros en cuantes qu'ello va afectar a llugares hasta agora virxes de presencia humana.

P'acabar, la realización de sondeos na costa Llastrina y la de Llanes a la gueta de Gas Natural merez tamién la censura de la organización.