Greenpeace defende una Asturies renovable nel 2050

Asturies podría ser autosuficiente pa tola so demanda d'electricidá nel escenariu del añu 2050 emplegando namás qu'enerxíes renovables, sigún un informe sobre renovables n'España ellaboráu pola Universidá Pontificia de Comillas pa la organización Greenpeace.

L'informe diz qu'Asturies tien recursos abondos n'enerxía termosolar, eólica terrestre, eólica marina -colos xeneradores puestos na mar- o enerxía maremotriz como pa furnir tola corriente que se cuenta que va ser precisa nos escenarios de consumu previstos pal añu 2050, y que falen d'unos 12,61TWh al añu. Entovía más, Greenpeace diz que se disponen de recurso pa multiplicar por siete esi consumu ensin recurrir a enerxíes contaminantes y amás, ensin alteriar coles instalaciones xeneradores -parques solares o estaciones de xeneradores eólicos- nengún paisaxe que cuente con categoría de protección mediuambiental.

Los estudios de Greenpeace sorrayen el potencial de desarrollu de la enerxía solar n'Asturies, y afirmen que, solamente cola solar, Asturies yá podría abastecese siete vegaes la demanda de corriente d'Asturies, mientres qu'aprovechando solamente la eólica terrestre podría multiplicase por 6 elconsumu de corriente n'Asturies, y otres cuatro más aprovechando la eólica marina. El mar podría apurrir tamién bien de corriente p'Asturies, doblando'l potencial disponible d'enerxía maremotriz la demanda revista pal escenariu del 2050.

Esti informe, que ta disponible na web de Greenpeace, ye la primer parte d'un estudiu que va siguise l'añu qu'entra cola apaición d'un segundu informe nel que va concretase l'inxerimientu de les renovables nel sistema eléctricu d'anguaño. Por de pronto, lo responsables de Greenpeace argumenten qu'esti estudiu "ruempe definitivamente la discusión enerxética» y pon en cuestión el feble PER (Plan d'Enerxíes Renovables) qu'aprobó va poco'l gobiernu socialista. Juan López Uralde, director de Greenpeace d'España, tampoco nun entiende a la lluz de los datos d'esti informe, que quiera volver a abrise'l debate de la nuclear nel estáu, y afirma que "Si queremos un escenariu cien por cien renovable n'España, y agora sabemos que ye posible, hai que tomar decisiones y éstes son escluyentes".