Greenpeace asitia 4 puntos prietos na costa asturiana

La organización ecoloxista Greenpeace presentó l'informe añal "destrucción a toda costa" en qu'analiza la situación de les riberes d'España. De los 50 puntos prietos del informe, cuatro son asturianos.

Con asitiar n'Asturies cuatro de los 50 puntos prietos qu'atopa n'España, l'informe añal de Greenpeace "Destrucción a toda costa" nun dexa en mal llugar la situación global de la costa asturiana. Greenpeace destaca nel entamu que nenguna comunidá tien la so costa en bones condiciones, anque dellos gobiernos van concenciándose de los problemes del litoral y miren d'atayalos con planes de protección o lluchando contra la contaminación, casu en que ta según Greenpeace, Cataluña, País Vascu y Asturies, mientres que les peores notes en conservación van pa les Baleares, Canaries, Murcia, la Comunidá Valenciana y Galicia, que miren más pola esplotación económica que pola conservación.

Los cuatro puntos escuros que llamen l'atención de la prestixosa organización internacional conservacionista son d'una parte la saca d'arena del Cabu Vidiu pa la rexeneración artificial de la playa de Salinas y en segundu llugar la contaminación de l'arena na playa de San Xuan de Nieva . La draga que ta faciéndose na ría del Nalón ye otra de les preocuipaciones prioritaries en cuantes que los vertíos del dragao que teníen de soltase a 3 milles de la costa tan faciéndose nuna zona de playa somorguiada d'interés pa la pesca a menos de dos milles de la costa. L'Ampliación del Puertu del Musel en Xixón, que yá apaeció como puntu negru nel 2003, ye'l cuartu fallu nel litoral asturianu, denunciando Greenpeace que l'alministración intenta resucitar l'alternativa "3C" que ye la mayor de toles coles que se trabaya.

En cuantes al Plan d'Ordenación del Litoral (POLA) ún de los temes estelares esti añu nel mediuambiente asturianu, Greenpeace empondera que se quiera controlar la edificación en llinia de costa pero ve que queden furacos llegales pa que la construcción ocupe la ribera, mientres que la figura de los parques playa qu'afala'l POLA merez una calificación negativa.

Descargar equí l'informe de Greenpeace sobre la costa asturiana