Grecia quier les sos estatues

La engarradiella que tienen Inglaterra y Grecia dende va yá doscientos años pola titularidá de los mármoles del Partenón podría tar pa resolvese a favor del bandu helénicu, pero ello nun sedría porque l'autoridá inglesa cambiare d'idega, sinon pola crisis del Muséu Británicu, que, énte un pufu de más de 6 millones d'euros, camienta devolver les estatues al so país d'orixe.

La historia entama en 1802, cuando'l noble escocés Lord Elgin arrampló coles estatues y relieves qu'adornaben el templu del Partenón n'Atenes pa que ficieren guapo na so mansión escocesa. D'aquella Grecia yera provincia del imperiu otomanu, y naide nun gurgutió pol robu, pero en cuantes Grecia recuperó la independencia, les históriques estatues del sieglu VI AC convirtiéronse nuna reivindicación irrenunciable pa tolos gobiernos griegos, que d'entós p'acá engarráronse nun diálogu de sordos col Muséu Británicu, titular de los mármoles. Del llau inglés, l'argumentación pa siguir arronchando coles estatues yera que en nenguna parte diben guardase meyor que nel British Museum y que más valía da-y les gracies a Lord Elgin, que de nun ser por elli igual yá nin esistiríen les esatues. Grecia nun arrenegó nunca a recuperar les estatues,
y la so causa alcontró simpatizantes nel mundu entero y hasta na mesma Inglaterra. La cercanía de los Xuegos Olímpicos del 2004 a facese n'Atenes valió pa que la reivindicación garrare fuelgu otra vegada y se sintiere más fuerte que nunca, sobremanera porque del llau inglés parez qu'hai debilidá. El British Muiseum atraviesa una fonda crisis económica que yá xenera una delda de 6 millones d'euros. La institución va despedir a un terciu de la so plantilla de conservadores, y bien de directivos reconocen que hai pieces antigües de gran valir como documentos, teles y otros materiales delicaos que yá tan dañándose pola falta de precuru. énte esta perspectiva, que baltia ún de los argumentos clásicos de los ingleses, la devolución a Grecia de los mármoles parez más cerca que nunca primero, pero'l casu ye que en toles potes cuecen fabes. Ello ye que n'Atenes yá ta preparándose un macromuséu de l'Acrópolis a costafecha pa guardar ellí los mármoles, que dan por seguro que van devolvelos. Pa facer esti muséu, el Ministeriu de Cultura de Grecia nun ta escatimando en perres, pero tampoco n'esfarraple. La obra pal nuevu equipamientu museísticu ta llevando per delantre una aldea cristiana y unos baños que funcionaron hasta depués d'época bizantina énte la vergüenza de la intelectualidá helena, que yá tien preparáu un manifiestu con más de 300 firmes de famosos y notables contra'l proyectu del muséu.

Contador Estadistiques