Gran victoria del Farho Xixón Baloncestu nun campu perdifícil

El Farho Xixón Baloncestu llogró una perimportante victoria escontra ún de los equipos que meyor entamu de lliga venía faciendo hasta agora y con una plantiya que val trés veces la de Farho Xixón. Los xixoneses plantaron cara dende`l principiu al equipu alicantinu y nun gran primer tiempu, que fino con catorce puntos pa los asturianos y con un Josh Fisher a gran nivel, ganaron por un 67-81, que reflexa la superioridá xixonesa nel campu xuegu. Esta superioridá del Farho Xixón sofitóse nel bon porcentaxe de tiros de dos puntos (25 de 39 intentos, con un 64%) y de tiros de campu (34 de 62 intentos, un 55%) por 43% (tiros de dos puntos) y 41% (tiros de campu) de los locales. Éstos namás ganaron nos tiros de trés puntos (71% escontra 44% xixonés) y nos rebotes 29 a 26.

El partíu entamó con un 0-4 pal Faho Xixón, anque dempués los alicantinos punxieron un 13-6 nel lletrónicu, después un 16-11 y de nueves un parcial de 0-12 voltió l´alcuentru con un 16-23 pa los xixoneses. Finándose`l cuartu con un 20-30, nel que se veía la superioridá foriata.

Nel segundu cuartu un parcial de 0-7 pa los asturianos traxo un 31-48 nel marcador, que foi la másima ventaya d´esti primer tiempu. Los locales averáronse con dos ataques siguíos que dexaron un resultáu de 36-50, pero tres del descansu l´anotación baxó y anque s'entamó con un 6-0 local los xugadores xixoneses, con una defensa mui fuerte y transiciones mui rápides, llograron caltener les diferencies de 10 y14 puntos. Los alicantinos encurtiaron les diferencies un poco finando'l cuartu con un 50-62. Nel caberu cuartu la rapidez nes transiciones, determinantes en tol partíu, ficieron que l'equipu asturianu llograre un parcial de 2-11, un 57-77, a trés minutos y mediu pa finar. Dempués el Calpe iguó un poco`l resultáu, finando col 67-81.

Alliniaciones:

Nel Farho Xixón Baloncestu`l meyor foi Josh Fisher (19 puntos, con trés triples de cinco intentos; 2 rebotes, 1 asistencia, 2 balones recuperaos y ficiéron-y trés faltes personales). Tamién rellumaron Chus Poves (13 puntos, trés triples de cinco intentos; 4 rebotes, 1 asistencia y 1 balón recuperáu), Antxon Iturbe (8 puntos, 8 rebotes, 1 asistencia y ficiéron-y cuatro personales), Brando Wolfram (13 puntos y 4 rebotes) y Mark Bigelow (12 puntos, 2 rebotes, 2 asistencies y 1 balón recuperáu).

Nel Calpe-Aguas de Calpe hai de destacar a Rashard Griffith (15 puntos, 6 rebotes, 1 asistencia y 1 balón recuperáu), Juan Carlos Liñán (13 puntos, 5 rebotes, 2 asistenciaes y 2 balones recuperaos) y a Harold Doyal (12 puntos, 4 rebotes y 1 balón recuperáu).

Calpe-Aguas de Calpe: Diego Ciorciari (11), Constante Ivars (3), Harold Doyal (12), José Luis Fernández (3) y Rashard Griffith (15). Tamién xugaron Jose´Luis Maluenda (10), Ricardo Busciglio, Juan Carlos Liñán (13) y Miguel Beltrán.


Farho Gijón Baloncesto: Josh Fisher (19), Chus Poves (13), Mark Bigelow (12), Roberto Morentin (5) y Brando Wolfram (13). Tamién xugaron: Antxon Iturbe (8), Rubén Suárez (4), Iñaki Narros (7), Juan Ignacio Jasen y Francis Koffi.


Árbitrios: Ángel de Lucas y Francisco Zafra. Nengún de los dos equipos tuvo xugadores eliminaos por faltes personales. Patíu de la quinta xornarda de la Lliga LEB, xugáu nel Pabellón Polideportivo Municipal de Calp (Alacant), con unos 900 espectadores.
Parciales per cuartos: 20-30, 16-20, 14-12 y 17-19.