Gotor recalca’l so compromisu de “da-y valir” a la llingua “dientro del marcu llegal establecíu”

El rector de la Universidá d’Uviéu, Vicente Gotor, inauguró esti martes les XXXI Xornaes d’Estudiu de l’ALLA. Na so intervención recalcó’l so compromisu de “da-y valir” a la llingua asturiana “dientro del marcu llegal establecíu”.

Una vegada más, remitióse a les titulaciones universitaries de llingua asturiana nueves llograes  mientres el so mandatu, asina como "la bayura d'aiciones pa plantegar la so visibilidá". Xunto a él tuvieron presentes Ana María Cano, presidenta de l’Academia de la Llingua Asturiana (ALLA), y Cristina Valdés Rodríguez, decana de la Facultá de Filosofía y Lletres, que tamién destacó’l compromisu de la institución "onde s'estudien llingües modernes pa formar especialistes". "Ésta", en referencia a les xornaes, "ye una de les meyores oportunidaes pa siguir ampliando conocimientu", comentó la decana.

Tres l’entamu, l’ex presidente de l’ALLA, Xosé Lluis García Arias, dio la ponencia inaugural que llevó’l títulu de ‘Conciencia llingüística y testos medievales nel Dominiu Ástur’. Nesta primer xornada tamién tuvo llugar la presentación de la edición dixital del ‘Lletres Asturianes 107’ y la revista dixital ‘Ciencies. Cartafueyos de Ciencia y Teunoloxía 2', actu nel que participó María Paz Suárez Rendueles, vicerrectora d'Investigación y Campus d'Escelencia Internacional de la Universidá d'Uviéu.

Presentación de ‘Tirán el Blancu’

Mañana, l’actividá va principiar a les 16 hores, nesta ocasión cola ponencia ‘Travesíes de la poesía asturiana’ de Leopolodo Sánchez Torre (Universidá d’Uviéu) y trés comunicaciones tres la so finalización, alredor de les 17 hores: ‘Poesía n’asturianu de Félix Aramburu’, de Xosé Ramón Iglesias Cueva; ‘Delles constantes temátiques na poesía del Surdimientu. Una güeyada a l’antoloxía Palabres clares’, de Cristina García; y ‘Delles aportaciones pa una historia de la publicidá n’asturianu’, d’Inaciu Galán. Tres un alderique y una posa, les comunicaciones van continuar a les 18.15 hores, nesta ocasión con ‘Aspeutos de les rellaciones ente tradición y creación lliteraria', de Roberto González-Quevedo; ‘Brotos cativos: una mirada circunstancial sobre dellos poetes últimos’, de Xosé Bolado; y ‘La (des)protección de la llingua en Lleón y Zamora’, de Nicolás Bartolomé Pérez.

Completen esti segundu día, a partir de les 19.15 hores, la ponencia ‘Una güeyada a la novela negra asturiana de güei’, a cargu de Emilio Frechilla (Universidá d’Uviéu) y la presentación de ‘Tirán el Blancu’, novela caballeresca en valenciano, escrita nel sieglu XVI por Joanot Martorell y traducida al asturianu por Pablo Suárez García, que coedita l'ALLA y l’Acadèmia Valenciana de la Llengua. L’actu va contar cola presencia de los presidentes de les dos entidaes, Ana María Cano y Ramon Ferrer, de manera respeutiva.