Gotor comprométese ante’l CUPA pa que’l reglamentu nuevu permita presentar tesis n’asturianu

El Reglamentu d’Estudios de Doctoráu va almitir la presentación de tesis n’asturianu. El rector de la Universidá, Vicente Gotor, comprometióse col CUPA a camudar l’artículu del borrador que namái dexaba usar llingües oficiales de la XE.
 
Javier Cubero y Inaciu Galán, miembros del Conceyu Universitariu pol Asturianu (CUPA) aconceyáronse con Gotor el vienres pasáu “col envís de buscar una solución pal conflictu denunciáu pol CUPA y pol que nel nuevu Reglamentu d’Estudios de Doctoráu nun se permitía la presentación de tesis n’asturianu”, señala’l coleutivu nun comunicáu nel qu’aseguren que’l rector “prometió aprobar una nueva redaición del Reglamentu nel Conseyu de Gobiernu de la Universidá del próximu xueves 21 de xunetu”.
 
“D’esta manera dase solución a un problema históricu na Universidá d’Uviéu y van poder presentase tesis n’asturianu ensin torgues de tipu llegal, pese al deficiente estatus del asturianu, que dende’l CUPA creemos necesario declarar oficial p’acabar con toes estes torgues d’una vez”, continúen los miembros del CUPA, que quieren agradecer el sofitu de “cientos de particulares”, amás de reconocer “el llabor de l’Academia de la Llingua Asturiana nesti procesu y de profesores y estudiantes de la propia Universidá, coles sos valioses aportaciones”. D’igual forma, celebren “la fin d’esta situación de marxinalidá qu’esistía pa cola llingua asturiana dende va más de 400 años y que vien causando dellos casos qu’enfrentaron a la Universidá d’Uviéu colos sos alumnos nos xulgaos, contradiciendo a los propios estatutos de la Universidá y la Llei d’Usu del Asturianu de 1998 que diz que ‘Tolos ciudadanos tienen derechu a emplegar el bable/asturianu y a espresase nél, de pallabra y por escrito’. Por últimu, el CUPA anima a tolos doctorandos a facer y presentar les sos tesis na llingua del país.
 
Tres la modificación del borrador del Reglamentu d’Estudios de Doctoráu, l’artículu 25 2.a, que trataba esti asuntu, quedaría asina: “La memoria que recueye’l llabor fechu na tesis doctoral redactaráse n’español. Sicasí, la Comisión de Docotoráu va poder autorizar la so redaición n’otru idioma oficial de la Xunión Europea, previu informe de la Comisión Académica del Programa de Doctoráu, y siempres que se garantice que los miembros del Tribunal tean en condiciones de xulgala. Nesti casu, la memoria ha contener el resume y les conclusiones n’español. Coles meses condiciones, y d’alcuerdu col artículu 6.2 de los Estatutos de la Universidá d’Uviéu, la redaición podrá facese en llingua asturiana”.