Google entama’l camín al Nasdaq

Google, el buscador más potente d'Internet, pue convertise agora nuna máquina de facer perres. Ente los accionistes del buscador, que va salir a bolsa darréu, tan Arnold Schwarzenegger o Henry Kissinger.

Ayeri'l buscador Google dio anuncia a les autoridaes norteamericanes del so plan pa salir a bolsa con una ufierta inicial de 2.700 millones de dólares. Con esta salida los fundadores del buscador, Sergy Brin y Larry Page, van entran na llista de los multimillonarios del planeta, ya qu'estos dos mozos (tovía caltienen una participación penriba'l 30%. La compañía d'Internet presentó tolos documentos a la Comisión del Mercáu de Valores d'Estaos Xuníos (SEC) como requisitu previu a la Ufierta Pública d'Acciones que va entamar. Ente la información espublizada del buscador destaquen los 105,6 millones de dólares de beneficiu netu del añu 2003, con una cifra de negociu raspiando los 1.000 millones de dólares. Según el reglamentu de la SEC, la salida a bolsa podría ser nun plazu de 60 díes, colo que l'últimu día posible pa ello ye'l 28 de xunu. Google dio anuncia de que la ufierta d'acciones va empobinada a cotizar nel mercáu electrónicu Nasdaq y tamién nel parqué de la Bolsa de Nueva York. Pasin ente pasu foron conociéndose más detalles sobre la operación, y asina nos últimos díes la compañía almitió que los sos asesores nella diben ser los bancos d'inversión Morgan Stanley y Credit Suisse First Boston.

La empresa fundada nel famosu Silicon Valley va facer más ricos tovía a los inversores que ficieron un apueste arriesgáu nos primeros momentos de vida del buscador. Ente esti grupu de privilexaos atopamos a empresarios d'ésitu como Andy Bechtolsheim, cofundador de Sun Microsystems, los fundadores d'AOL, Netscape, eBay, Yahoo o Napster y los fondos de capital riesgu Sequoia Capital y Kleiner Perkins Caufield & Byers. Pero tamién ente los inversores hai xente conocío como l'actor y anguaño gobernador de California Arnold Schwarzenegger "Terminator", el golfista Tiger Woods, el xugador de balocestu Shaquille O'Neal o'l mesmu Henry A. Kissinger. La Universidá de Stanford, onde estudiaron los fundadores de Google, Sergy Brin y Larry Page, tamién va ganar bien de perres col buscador ya que tien la patente del mesmu. Pa facese una idea de los númberos de que tamos falando, val con dicir que nel casu de Andy Bechtolsheim, cofundador de Sun Microsystems, que punxo na empresa 200.000 dólares va cuatro años, cuenta con ganar 300 millones de dólares cola salida a bolsa del buscador.

Una de les calterístiques de la ufierta d'acciones de Google ye'l sistema que va furrular pa vender les participaciones. La compañía ta trabayando nun sistema de susbasta na rede pa evitar la especulación y les consecuencies de la burbuya d'Internet del añu 2000. L'oxetivu de la ufierta d'acciones ye asina'l d'algamar una meyor posición pa competir con Microsoft y Yahoo, pero calteniendo'l calter de buscador independiente. Sicasí, los riesgos son bien altos, casu de la probable OPA hostil por parte de Microsoft xunta la presión de la comunidá inversora d'algamar grandes beneficios. Ensin dulda, el mayor peligru de Google ye morrer d'ésitu.