Google entama un proyeutu pa salvar idiomes en peligru de desaniciu nel qu’inclúi a la llingua asturiana

‘Endangered languages’ ye’l nome del proyeutu que ta acabante d’entamar Google pa salvar idiomes en peligru de desaniciu. Nel llistáu de 3.054 llingües ta incluyíu l’asturianu y el mirandés, amás del aragonés y el catalán de signos.
 
Según esplicó nel so blogue oficial el guetador, la idea ye "crear una plataforma onde se pueda alcontrar y compartir la información más completa y recién sobre los idiomes en peligru". Na páxina del proyeutu hai colgaos vídeos con falantes nativos, tanto del aragonés como del asturianu, asina como información adicional arrexuntada de delles fontes sobre dambos llinguaxes. Google alvierte de que nesti momentu l'aragonés fálenlu menos de 10.000 persones y, anque tovía hai adultos que lu usen, "pocos neños lu daprenden nel país". Menos riesgos de desapaecer cuerre l'asturianu según el xigante estauxunidense, que cifra nun escasu 100.000 el númberu total de falantes nativos. Sicasí, destaca l’apoyu de la sociedá asturiana al idioma, que se siente arguyosa d'utilizalu.
 
L’oxetivu ambiciosu del proyeutu ye "caltener y promover la cultura al traviés d'Internet" per mediu de la puesta en práutica de "un espaciu collaborativu onde cualquiera va poder aportar les sos conocencies sobre les distintes llingües", y llograr asina "honrar les conocencies de los nuesos mayores y arriquecer el futuru de los mozos". Un grupu diversu de collaboradores yá entamó a aportar conteníu que toma dende manuscritos del sieglu XVIII a ferramientes modernes pa la enseñanza d'idiomes como vídeos, muestres d'idiomes n'audiu y artículos pa compartir conocimientos. Los miembros del Comité Asesor tamién aportaron directrices p'ayudar a entamar la plataforma y satisfacer los intereses y necesidaes de les comunidaes llingüístiques.